न्यू साउथ वेल्समा १२ घण्टाभित्र तीन महिलाको मृत्यु, तीन पुरुषमाथि हत्या आरोप

असोज ४, काठमाडौं । अस्ट्रेलियाको न्यू साउथ वेल्समा करिब १२ घण्टाको अवधिमा छुट्टाछुट्टै घटनामा तीन महिलाको मृत्यु भएको छ। घटनामा संलग्न रहेको आरोपमा तीन पुरुष पक्राउ परी हत्या तथा घरेलु हिंसासम्बन्धी आरोपमा मुद्दा चलाइएको छ।

सिड्नीको बन्डाइ बीचस्थित आफ्नै युनिटमा ९० वर्ष आसपासकी एक वृद्धा शनिबार साँझ घाइते अवस्थामा फेला परेकी थिइन्। उनको शरीरमा चक्कु प्रहारका चोट देखिएको थियो। घटनास्थलमै उपचारका क्रममा उनको मृत्यु भएको प्रहरीले जनाएको छ। घटनामा ४७ वर्षीय एक पुरुष पक्राउ परेका छन् र उनीमाथि घरेलु हिंसासम्बन्धी हत्या आरोप लगाइएको छ।

त्यसैगरी, न्यू साउथ वेल्सकै वाग्गा वाग्गामा २३ वर्षीया युवती घरभित्र गम्भीर चक्कु प्रहारबाट घाइते अवस्थामा फेला परेकी थिइन्। शनिबार बिहान करिब ११ः४५ बजे उद्धार टोली पुगे पनि उनलाई बचाउन नसकिएको प्रहरीले जनाएको छ। अनुसन्धानकर्ताका अनुसार मृतक युवती र पक्राउ परेका ३१ वर्षीय पुरुष सम्बन्धमा थिए। ती पुरुषलाई पछि हत्याको आरोप लगाइएको छ।

यता राज्यको उत्तरी क्षेत्रमा पर्ने मोल रिभरमा शनिबार राति ७० वर्ष आसपासकी अर्की महिला मृत अवस्थामा फेला परेकी थिइन्। घरेलु हिंसासम्बन्धी घटनाको सूचना पाएपछि प्रहरी पुगेको र त्यस क्रममा छिमेकी घरमा ती महिलाको शव भेटिएको थियो। घटनामा ३७ वर्षीय पुरुष पक्राउ परेका छन् र उनीमाथि पनि हत्या आरोप लगाइएको छ।

प्रहरीले यी घटनाबारे थप अनुसन्धान गरिरहेको जनाएको छ। घटनामा संलग्न भनिएका पुरुषहरू अदालतमा उपस्थित हुने क्रममा छन्।

न्यू साउथ वेल्समा छोटो अवधिमै तीन महिलाको मृत्यु भएपछि महिला सुरक्षा र घरेलु हिंसाको विषय पुनः चर्चामा आएको छ। राज्यकी विपक्षी नेतृ केली स्लोनले घटनाप्रति चिन्ता व्यक्त गर्दै महिलाहरू उमेर जुनसुकै भए पनि आफ्नै घरमा समेत सुरक्षित हुन नसकेको बताएकी छन्।