डिजिटल अर्थतन्त्रमा महिलाको पहुँच बढाउन फिजीले ७.७ मिलियन डलर लगानी गर्ने

असोज  १९ , काठमाडौं । फिजी सरकारले महिलालाई डिजिटल प्रविधिमार्फत आर्थिक अवसरमा जोड्न ७.७ मिलियन अमेरिकी डलर बराबरको लगानी गर्ने भएको छ। सरकारले इन्टरनेटमा पहुँच मात्र बढाएर नपुग्ने भन्दै महिलालाई डिजिटल सीप, व्यवसाय सञ्चालन र आम्दानीका अवसरसँग जोड्ने योजना अघि सारेको हो।
फिजीकी महिला, बालबालिका तथा सामाजिक संरक्षणमन्त्री साशी किरनका अनुसार ग्रामीण, दुर्गम तथा समुद्री क्षेत्रमा बसोबास गर्ने महिलालाई डिजिटल प्रविधिको प्रभावकारी प्रयोग गर्न सक्षम बनाउनु योजनाको मुख्य उद्देश्य हो। उनका अनुसार महिलाले इन्टरनेटमा पहुँच पाएपछि त्यसलाई सीप, व्यवसाय र आम्दानीमा रूपान्तरण गर्न सक्नुपर्नेछ।
सरकारले कोरिया अन्तर्राष्ट्रिय सहयोग नियोग (कोइका)सँगको सहकार्यमा सन् २०२६ देखि २०२९ सम्म सञ्चालन हुने ३.५ मिलियन अमेरिकी डलरको परियोजना अघि बढाएको छ। परियोजनामार्फत ग्रामीण तथा दुर्गम क्षेत्रका महिलालाई उद्यमशीलता, व्यवसाय योजना, वित्तीय व्यवस्थापन, कर, बजार व्यवस्थापन र डिजिटल सीपसम्बन्धी तालिम दिइनेछ।
यस कार्यक्रमबाट फिजीका मध्य तथा पश्चिमी क्षेत्रका करिब १३० महिला समूह लाभान्वित हुने अपेक्षा गरिएको छ। कार्यक्रमअन्तर्गत ट्याबलेट, ल्यापटप, इन्टरनेट डेटा तथा साना अनुदानसमेत उपलब्ध गराइनेछ।
मन्त्री किरनले महिलालाई केवल इन्टरनेटमा जोड्ने नभई प्रविधिको प्रयोगबाट व्यवसाय विस्तार, नयाँ बजारमा पहुँच र डिजिटल अर्थतन्त्रमा सक्रिय सहभागिता सुनिश्चित गर्नुपर्नेमा जोड दिएकी छन्।