सात वर्षीया बालिकाको पहलपछि मर्मत भयो जीर्ण सडक

भदौ ३१, काठमाडौं । भारतको उत्तर प्रदेशस्थित मऊमा सात वर्षीया बालिका समरा नाजको पहलपछि उनको बस्तीको जीर्ण सडक पुनर्निर्माण गरिएको छ।

समराले गत सेप्टेम्बर १ मा जिल्ला अधिकारी आनन्द वर्धनसमक्ष निवेदन दिँदै आफ्नो घरदेखि विद्यालय जाने सडक निकै बिग्रिएको र हिँड्दा आफू पटक–पटक लड्ने गरेको बताएकी थिइन्। सडकको खराब अवस्थाका कारण विद्यालय जाँदा पोसाकसमेत फोहोर हुने उनको गुनासो थियो।

जिल्ला अधिकारीले बालिकाको गुनासो सुनेपछि सडक मर्मत गर्ने आश्वासन दिएका थिए। त्यसको भोलिपल्टै नगर परिषद्को प्राविधिक टोलीले सडकको मापन गरी निर्माणसम्बन्धी प्रक्रिया अघि बढाएको थियो। त्यसपछि क्षतिग्रस्त सडकको स्थायी रूपमा पुनर्निर्माण गरिएको हो।

सडक निर्माण सम्पन्न भएपछि जिल्ला अधिकारी वर्धन स्वयं समराको घर पुगेका थिए। उनले बालिकासँग सडक बनेपछि खुसी भए–नभएको सोध्दै मिठाई खुवाएका थिए। उनलाई चकलेट र साइकलसमेत उपहार दिइएको समाचारमा उल्लेख छ।

जिल्ला अधिकारीले सार्वजनिक गुनासो राख्न नडराएको भन्दै समराको प्रशंसा गरेका छन्। उनले उक्त क्षेत्रका अन्य आवश्यक सडक निर्माणका लागि पनि प्रशासनले काम अघि बढाउने बताएका छन्।

बालबालिकामाथि हुने हिंसा, दुर्व्यवहार तथा शोषण रोकथामका लागि कानुनी व्यवस्था प्रभावकारी बनाउनुपर्ने विषय पछिल्लो समय निरन्तर उठ्दै आएको छ।