वर्षाको पानी जमिनमै पठाउने महानगरको योजना, सुरु हुँदै ‘रिचार्ज काठमाडौं’

भदौ २८, काठमाडौं । काठमाडौं महानगरपालिकाले सहरी क्षेत्रमा बढ्दै गएको फ्ल्यास फ्लड अर्थात् सहरी बाढीको जोखिम न्यूनीकरण गर्न ‘रिचार्ज काठमाडौं’ अभियान सञ्चालन गर्ने भएको छ।

महानगरले वर्षाको पानी सङ्कलन गर्ने, जमिनमा पुनर्भरण गर्ने तथा पानीको उचित व्यवस्थापन गर्ने उद्देश्यले अभियान अघि बढाउन लागेको हो। कार्यवाहक प्रमुख सुनिता डंगोलले काठमाडौंमा थोरै पानी पर्दासमेत बाढी आउने अवस्था सिर्जना भएकाले यसको दीर्घकालीन समाधान खोज्न अभियान सुरु गर्न लागिएको बताइन्। 

उनका अनुसार करिब तीन दशकअघि सहरी क्षेत्रमा जथाभावी गरिएको विकास तथा संरचना निर्माणका कारण अहिले सहरी फ्ल्यास फ्लडको समस्या बढेको हो। वर्षा हुन थालेपछि नगर प्रहरी, विपद् व्यवस्थापन टोली र जनप्रतिनिधि मध्यरातमै समेत फिल्डमा खटिनुपर्ने अवस्था रहेको उनले बताइन्। 

महानगरले सहरी बाढी नियन्त्रणका लागि दीर्घकालीन उपायबारे अध्ययन गरिरहेको भए पनि अध्ययनको प्रतिवेदन पर्खेर मात्र नबस्ने जनाएको छ। तत्काल गर्न सकिने कामबाटै समाधानको सुरुवात गर्ने उद्देश्यले ‘रिचार्ज काठमाडौं’ अभियान अघि बढाइएको डंगोलले बताइन्। 

अभियानअन्तर्गत वर्षाको पानी सङ्कलन, जमिनमा पानी पुनर्भरण र पानीको उचित व्यवस्थापनलाई प्राथमिकता दिइनेछ। महानगरले यस्ता उपायमार्फत काठमाडौंलाई बाढीको जोखिमबाट सुरक्षित र व्यवस्थित बनाउने लक्ष्य लिएको छ।