श्रीमान्को हत्या आरोपमा श्रीमती, उनकी आमा र कथित प्रेमी पक्राउ

भदौ २८, काठमाडौं । भारतको बेंगलुरुमा श्रीमान्को हत्या गरेको आरोपमा ३७ वर्षीया महिला, उनकी आमा र महिलाका कथित प्रेमी पक्राउ परेका छन्। प्रहरीले श्रीमान्को मृत्यु हृदयाघातबाट भएको देखाउन घटनास्थललाई कृत्रिम रूपमा तयार पारिएको आरोप लगाएको छ।

पक्राउ पर्नेमा किथागानुरको येल्लप्पा गार्डेनकी शाहिना बानु, उनकी आमा हसिना र कथित प्रेमी नहिमुद्दिन कुरेसी रहेका छन्। मृतकको पहिचान ४० वर्षीय मुबारकका रूपमा गरिएको छ।

प्रहरीका अनुसार मुबारक करिब दुई वर्षदेखि पक्षाघातका कारण ओछ्यानमै थिए। उनकी छोरी पनि मानसिक स्वास्थ्यसम्बन्धी समस्याबाट पीडित थिइन्। छोरीको उपचार गर्ने भन्दै नहिमुद्दिन उनीहरूको घरमा नियमित आउने गर्थे। सोही क्रममा शाहिना र नहिमुद्दिन नजिकिएका थिए।

प्रहरीको प्रारम्भिक अनुसन्धानअनुसार शाहिनाले श्रीमान्को हेरचाह गर्न आफूलाई कठिन भइरहेको कुरा आफ्नी आमा र नहिमुद्दिनसँग बताएकी थिइन्। त्यसपछि मुबारकको हत्या गर्ने योजना बनेको आरोप छ।

बुधबार राति मुबारक सुतिरहेका बेला शाहिना र उनकी आमाले सिरानीले उनको मुख थिचेर हत्या गरेको तथा शरीरका विभिन्न भागमा समेत चोट पुर्‍याएको प्रहरीको दाबी छ। त्यसपछि उनीहरूले मुबारकको मृत्यु हृदयाघातबाट भएको देखाउने प्रयास गरेको प्रहरीले जनाएको छ।

घटनापछि आफन्तलाई मुबारकको हृदयाघातबाट मृत्यु भएको जानकारी दिइएको थियो। तर आफन्तलाई शंका लागेपछि उनीहरूले अवलाहल्ली प्रहरीमा उजुरी दिएका थिए। प्रहरीले सुरुमा अस्वाभाविक मृत्युको मुद्दा दर्ता गरेको थियो।

पोस्टमार्टम रिपोर्टमा मुबारकको शरीरका विभिन्न भागमा चोट देखिएपछि घटना हत्या भएको खुलेको प्रहरीले जनाएको छ। त्यसपछि शाहिना र हसिनालाई नियन्त्रणमा लिएर सोधपुछ गर्दा कथित हत्या योजनाबारे जानकारी खुलेको र उनीहरूले नहिमुद्दिनको भूमिकाबारे समेत बताएपछि तीनै जनालाई पक्राउ गरिएको हो।

प्रहरीले घटनाबारे थप अनुसन्धान भइरहेको जनाएको छ।