रोडमा पार्किङ सहज बनाउन एनएसी भवनमा बहुस्तरीय पार्किङको प्रस्ताव

भदौ २८, काठमाडौं । काठमाडौं महानगरपालिकाले न्युरोडस्थित नेपाल वायुसेवा निगम ९एनएसी० को भवनलाई बहुस्तरीय पार्किङ संरचनाका रूपमा विकास गर्न संघीय सरकारसँग अनुमति मागेको छ।

काठमाडौंमा दिनप्रतिदिन बढ्दै गएको पार्किङ समस्या समाधान गर्न सीमित स्थानको अधिकतम उपयोग गर्ने उद्देश्यले महानगरले यस्तो प्रस्ताव अघि सारेको हो।

आइतबार काठमाडौं महानगर प्रहरी बलको ३४औँ वार्षिकोत्सव कार्यक्रममा बोल्दै कार्यवाहक प्रमुख सुनिता डंगोलले एनएसीको भवनमा बहुस्तरीय पार्किङ निर्माणका लागि संघीय सरकारसँग विशेष अनुरोध गरिएको जानकारी दिइन्।

डंगोलका अनुसार काठमाडौंको क्षेत्रफल सीमित भएकाले नयाँ ठाउँ खोज्नुभन्दा उपलब्ध स्थानको प्रभावकारी उपयोग गरी पार्किङ व्यवस्थापन गर्नु आवश्यक छ।

‘पार्किङको समस्या दिनप्रतिदिन बढ्दै गइरहेको छ। हाम्रो क्षेत्रफल सीमित भएकाले उपलब्ध ठाउँको सही सदुपयोग गरेर पार्किङ व्यवस्थापन गर्नु आजको आवश्यकता हो,’ उनले भनिन्।

एनएसीको भवनमा बहुस्तरीय पार्किङ निर्माण गर्न सकिएमा काठमाडौंको मुख्य सहरी क्षेत्र अर्थात् ‘कोर एरिया’मा देखिएको पार्किङ समस्या समाधान गर्न महत्वपूर्ण योगदान पुग्ने महानगरको विश्वास छ।

महानगरले काठमाडौंभरको पार्किङ समस्या र यसको दीर्घकालीन व्यवस्थापनका विषयमा विज्ञमार्फत विस्तृत अध्ययनसमेत गराइरहेको जनाएको छ।

कार्यवाहक प्रमुख डंगोलका अनुसार केही समयभित्र विज्ञहरूको अध्ययन प्रतिवेदन प्राप्त हुनेछ। प्रतिवेदनमा दिइएका सुझावका आधारमा पार्किङ व्यवस्थापनलाई थप व्यवस्थित, वैज्ञानिक र प्रणालीगत बनाउँदै समस्या समाधानतर्फ महानगर अघि बढ्नेछ।