माइकल ज्याक्सनको सम्पत्तिमा फेरि विवाद, छोरी पेरिसको कानुनी शुल्क मागमा आपत्ति

असोज २, काठमाडौं । अमेरिकी पपस्टार माइकल ज्याक्सनको सम्पत्तिसम्बन्धी विवाद फेरि चर्किएको छ। उनकी छोरी पेरिस ज्याक्सनले माग गरेको ११ लाख ६५ हजार अमेरिकी डलरभन्दा बढी कानुनी शुल्कप्रति माइकल ज्याक्सनको सम्पत्तिका कार्यकारीले आपत्ति जनाएका छन्। पेरिसले आफ्ना वकिलमार्फत सम्पत्तिसम्बन्धी कानुनी विवादमा गरेको कामको पारिश्रमिकस्वरूप उक्त रकम मागेकी हुन्।

यसअघि पेरिसले माइकल ज्याक्सनको सम्पत्तिबाट कानुनी फर्महरूलाई दिइएको करिब ६ लाख २५ हजार डलर बोनस भुक्तानीलाई चुनौती दिएकी थिइन्। अदालतले उनको पक्षमा फैसला गर्दै उक्त रकम सम्पत्तिमा फिर्ता गर्न आदेश दिएको थियो। सोही कानुनी प्रक्रियामा पेरिसलाई उचित कानुनी शुल्क पाउने अधिकारसमेत दिइएको थियो।

तर सम्पत्तिका कार्यकारी जोन ब्रान्काले पेरिसले मागेको रकम अत्यधिक भएको दाबी गरेका छन्। सम्पत्तिले पेरिसले उठाएको कानुनी मुद्दासँग प्रत्यक्ष सम्बन्धित कामका लागि उचित शुल्क दिन आफूहरू तयार रहेको तर माग गरिएको रकममा अन्य विषयसँग सम्बन्धित कामसमेत समावेश भएको जनाएको छ।

माइकल ज्याक्सनको निधनपछि उनको सम्पत्तिको व्यवस्थापन ब्रान्का र जोन म्याक्लेनले गर्दै आएका छन्। पेरिसले पछिल्ला वर्षहरूमा सम्पत्तिको आर्थिक व्यवस्थापन, वकिललाई गरिएको भुक्तानी तथा कार्यकारीहरूको निर्णयबारे प्रश्न उठाउँदै आएकी छन्। कार्यकारीहरूले भने उनीहरूको व्यवस्थापनमा सम्पत्ति ठूलो आर्थिक सुधार भएको र परिवारका सदस्यले त्यसबाट उल्लेख्य लाभ पाएको दाबी गर्दै आएका छन्।

हाल पेरिसले माग गरेको कानुनी शुल्कको अन्तिम निर्णय अदालतबाट हुन बाँकी छ। यससँगै माइकल ज्याक्सनको सम्पत्तिको व्यवस्थापन र कानुनी खर्चसम्बन्धी लामो समयदेखिको विवाद पुनः चर्चामा आएको छ।