महिलाको पीडालाई सामान्य नठान्न चिकित्सक र समाजलाई आग्रह

भदौ २८, काठमाडौं । महिलाले भोग्ने प्रजनन स्वास्थ्यसम्बन्धी पीडा र समस्यालाई सामान्य रूपमा लिने प्रवृत्ति अन्त्य गर्नुपर्ने आवाज उठेको छ। द इन्डियन एक्सप्रेसमा प्रकाशित एक विचार लेखले महिलाको स्वास्थ्यसम्बन्धी समस्या लामो समयसम्म बेवास्ता हुने गरेको भन्दै उनीहरूको पीडालाई गम्भीरतापूर्वक सुन्न र उपचार गर्नुपर्नेमा जोड दिएको छ।

लेखमा एन्डोमेट्रियोसिस, महिनावारीसँग सम्बन्धित समस्या तथा पोलिएन्डोक्राइन मेटाबोलिक ओभेरियन सिन्ड्रोम ९पीएमओएस० जस्ता अवस्थाको पहिचान र उपचारमा महिलाले लामो समय कुर्नुपर्ने अवस्था रहेको उल्लेख गरिएको छ। कतिपय महिलाले वर्षौंसम्म चिकित्सक र अस्पताल धाउँदा पनि सही निदान नपाउने समस्या रहेको लेखमा बताइएको छ।

भारतमा गरिएको पहिलो जिनोम–वाइड एन्डोमेट्रियोसिस अध्ययनले यस रोगको विकासमा आनुवंशिक पक्षको भूमिका देखाएको र दक्षिण एसियाली जनसंख्यालाई आनुवंशिक अनुसन्धानमा समेट्ने दिशामा महत्वपूर्ण कदम भएको लेखमा उल्लेख छ। यसले महिलाको प्रजनन स्वास्थ्यसम्बन्धी समस्याबारे थप अनुसन्धान र संवादको आवश्यकता पनि देखाएको छ।

लेखका अनुसार इतिहासदेखि नै महिलाका शारीरिक तथा मानसिक स्वास्थ्य समस्यालाई गलत रूपमा व्याख्या गर्ने र उनीहरूको पीडालाई कम आँक्ने प्रवृत्ति रहँदै आएको छ। आज पनि एन्डोमेट्रियोसिसको सही निदान हुन १२ वर्षसम्म लाग्न सक्ने अवस्था रहेको उल्लेख गरिएको छ।

भारतका विभिन्न क्षेत्रमा महिनावारी र प्रजनन स्वास्थ्य अझै पनि सामाजिक वर्जना तथा लाजसँग जोडिएको विषय रहेकाले महिलाहरू आफ्ना समस्या खुलस्त रूपमा व्यक्त गर्न हिच्किचाउने अवस्था रहेको लेखले औंल्याएको छ। यस्तो सामाजिक धारणाले स्वास्थ्य सेवामा रहेको लैंगिक पूर्वाग्रहलाई थप गम्भीर बनाउन सक्ने बताइएको छ।

लेखले महिलाको स्वास्थ्य समस्या समाधानका लागि चिकित्सा क्षेत्रको प्रयास मात्र पर्याप्त नहुने निष्कर्ष निकाल्दै महिलाको पीडालाई विश्वास गर्ने, सुन्ने र सम्मानपूर्वक उपचार गर्ने सामाजिक वातावरण आवश्यक रहेकोमा जोड दिएको छ।