नारीहरुको सुन मोह बहुमूल्य बन्दै, तोलाकै ९५ हजार पुग्नसक्ने

पुस २३, काठमाडौं । नारीहरुको सोह्र श्रृगारमा पर्ने गहना मध्येकै लोकप्रिय मानिएको सुनको गहना अर्थात बहुमूल्य पहेँलो धातुको मूल्य अहिले नेपाली बजारमा इतिहासकै उच्च विन्दुमा पुगेको छ । सुनलाई प्रतिष्ठा, सम्पन्नता  र महिला सौन्दर्यको कडिको रुपमा हेरिने नेपाली समाजमा सुनको मूल्यमा भएको अचाक्ली वृद्धिले हलचल मच्चाइदिएको छ । 

केही वर्ष अघिसम्म ६० हजार रुपैयाँ प्रतितोला रहेको सुुन मूल्य अहिले बढेर ७६ हजारको उच्चतम विन्दू समेत पार गरिसकेको छ।

सुनको मूल्य बढ्नुमा नेपालको आन्तरिक कारणले भन्दा बढी बाह्य कारणले प्रभाव पार्छ । किनभने नेपालमा आउने सुनको मूल्य अन्तराष्ट्रिय परिघटनाबाट प्रभावित हुने गर्छ । 

नेपाली बजारमा मात्रै नभएर अहिले सुनको मूल्य अन्तराष्ट्रिय रुपमै उकालो लाग्दैछ । जसको प्रमुख कारणको रुपमा इरान र अमेरीकाबीच सिर्जित सैन्य तनाव रहेको छ । 

अहिले इरान र अमेरिका युद्धको अवस्थाबाट गुज्रिरहेका छन् । इरानी सेनाले इराकमा रहेका अमेरिकी सेनाको बेस क्याम्पमा हमला गरेपछि तनाव झनै बढ्ने संकेत देखिएको छ । यस्तोमा विश्वभरका लगानीकर्ताले शेयरमा लगानी गरेको आफ्नो पैसा झिकेर सुरक्षित लगानीको रुपमा सुनमा खन्याइरहेका छन् । जसले गर्दा सुनको माग अत्यधिक बढिरहेको छ । अर्थशास्त्रीय नियमअनुसार सीमित मात्रामा सञ्चित रहेको सुनको मागलाई आपूर्तिले धान्न नसक्दा सुनको मूल्य ह्वात्तै बढ्न पुगेको हो ।

अहिले अन्तराष्ट्रिय बजारमा सुनको मूल्य प्रतिऔंस १६०० डलर पुगेको छ । जुुन सन् २०१३ मार्च यताकै उच्च हो । यदि अमेरिका र इरानबीचको सम्बन्धमा सुधार नआए सुनको मूल्य अझै बढ्नसक्ने प्रक्षेपण गर्न थालिएको छ। विश्लेषकहरुका अनुसार मूल्य बढेर प्रतिऔंस २००० डलरसम्म पुग्न सक्नेछ । यदि त्यसो भयो भने नेपालमा समेत सुनको मूल्य बढेर प्रतितोला ९५ हजार रुपैयाँको विन्दूमा पुग्नसक्नेछ ।