भारतको सौन्दर्य उद्योगमा लगानी बढ्दो, महिला उद्यमीका ब्रान्ड विश्व बजारतर्फ

भदौ ४ , काठमाडौं । भारतको सौन्दर्य तथा व्यक्तिगत हेरचाह उद्योगमा विदेशी लगानीकर्ताको आकर्षण तीव्र रूपमा बढेको छ। बढ्दो आम्दानी, ई–कमर्सको विस्तार र युवा पुस्ताको सौन्दर्यप्रतिको बढ्दो रुचिले भारतीय सौन्दर्य बजारलाई तीव्र गतिमा विस्तार गरिरहेको छ।
यसै क्रममा अमेरिकी लक्जरी कस्मेटिक्स कम्पनी एस्टी लाउडरले भारतीय आयुर्वेदिक ब्रान्ड फरेस्ट एसेन्सियल्स पूर्ण रूपमा अधिग्रहण गरेको छ। फ्रान्सेली कम्पनी लोरियलले पनि डिजिटल पर्सनल केयर ब्रान्ड इनोभिस्टमा बहुमत हिस्सेदारी खरिद गरेको छ। युनिलिभरले समेत पछिल्ला केही वर्षमा भारतका सौन्दर्य व्यवसायमा विभिन्न लगानी गरेको छ।
फरेस्ट एसेन्सियल्सको सफलतामा यसको संस्थापक मीरा कुलकर्णीको भूमिका उल्लेखनीय छ। दुई सन्तानकी एकल आमा कुलकर्णीले हिमालयको फेदीमा ग्यारेजबाट सुरु गरेको व्यवसाय दुई दशकमा विश्व बजारमा फैलिएको अर्ब डलर मूल्यको कम्पनी बनेको छ।
भारतको सौन्दर्य उद्योग सन् २०२५ मा करिब २३ अर्ब अमेरिकी डलर बराबरको रहेकोमा दशकको अन्त्यसम्म करिब ४० अर्ब डलर पुग्ने अनुमान गरिएको छ।
विशेषज्ञका अनुसार बढ्दो क्रयशक्ति, इन्टरनेट, सामाजिक सञ्जाल र ई–कमर्सले यो बजार विस्तारमा महत्वपूर्ण भूमिका खेलेका छन्। सन् २०३० सम्म भारतको कुल सौन्दर्य खर्चमध्ये करिब ३५ प्रतिशत ई–कमर्समार्फत हुने अनुमान छ।
कोभिड–१९ महामारीपछि मानिसमा व्यक्तिगत हेरचाह र स्किनकेयरप्रतिको रुचि अझ बढेको व्यवसायीहरू बताउँछन्। सामाजिक सञ्जाल र डिजिटल सामग्रीका कारण भारतका साना सहर तथा ग्रामीण क्षेत्रका उपभोक्ताले समेत विश्वभरका सौन्दर्य उत्पादन र प्रवृत्तिबारे जानकारी पाउन थालेका छन्।
युवा पुस्ता विशेषगरी जेन जेड यस बजारको प्रमुख चालक बनेको छ। फ्लिपकार्टका अनुसार उसका सौन्दर्य तथा व्यक्तिगत हेरचाहका करिब ५६ प्रतिशत ग्राहक जेन जेड छन्। उनीहरूमध्ये ७० प्रतिशतले सामाजिक सञ्जालबाट उत्पादनबारे जानकारी पाउने गरेका छन्।
विशेषज्ञहरूले आगामी तीनदेखि पाँच वर्षमा भारतका कम्तीमा १० देखि १५ वटा सौन्दर्य कम्पनीले २० करोड अमेरिकी डलरभन्दा बढी वार्षिक आम्दानी गर्न सक्ने अनुमान गरेका छन्। यससँगै आईपीओ, मर्जर तथा अधिग्रहणको गतिविधि पनि थप बढ्ने अपेक्षा गरिएको छ।