डोमिनिकन रिपब्लिककी जोहेइरी मोलाले जितिन् ‘मिस वर्ल्ड २०२६’ को उपाधि

भदौ २१, काठमाडौं । डोमिनिकन रिपब्लिककी जोहेइरी मोलाले ‘मिस वर्ल्ड २०२६’ को उपाधि जितेकी छन्। भियतनाममा शनिबार राति सम्पन्न फिनालेमा १११ देशका सुन्दरीलाई पछि पार्दै २४ वर्षीया मोलाले विश्व सुन्दरीको ताज पहिरिएकी हुन्।

मोलाका लागि यो उपाधि डोमिनिकन रिपब्लिकको दोस्रो ‘मिस वर्ल्ड’ ताज हो। यसअघि सन् १९८२ मा मारियासेला अल्भारेजले उक्त देशका लागि पहिलोपटक मिस वर्ल्डको उपाधि जितेकी थिइन्।

भियतनामको न्हा ट्राङमा आयोजित फिनालेमा स्पेनकी एलिजाबेथ रेयनेस पहिलो रनरअप बनिन् भने मलेसियाकी तानुसिया चेट्टी दोस्रो रनरअप घोषित भइन्।

मोलाको सामाजिक अभियानले पनि प्रतियोगितामा विशेष चर्चा पाएको थियो। उनले कमजोर तथा सुविधाबाट वञ्चित समुदायका बालबालिका र युवालाई अंग्रेजी भाषा शिक्षा प्रदान गर्ने  ‘भोलिका आवाजहरू’ परियोजना सञ्चालन गर्दै आएकी छन्। उनी शिक्षिका, पत्रकार तथा सामाजिक अभियन्तासमेत हुन्।

मोलाले व्यवसाय व्यवस्थापन तथा प्रशासनमा अध्ययन गरेकी छन्। उनी साहित्य तथा सामाजिक अध्ययन विषय अंग्रेजी माध्यमबाट अध्यापनसमेत गर्दै आएकी छन्।

यस वर्षको प्रतियोगिता पहिलोपटक भियतनाममा आयोजना भएको थियो। फिनालेपछि सन् २०२७ को मिस वर्ल्ड प्रतियोगिता तान्जानियामा आयोजना हुने घोषणा गरिएको छ।