‘महिलालाई कोटामा होइन, खुला प्रतिस्पर्धामै नेतृत्व गर्ने अवसर चाहिन्छ’ : सीता गुरुङ

असोज २१ , काठमाडौं । नेपाली कांग्रेसकी उपसभापति पदकी उम्मेदवार सीता गुरुङले महिलाको राजनीतिक सहभागिता आरक्षण वा कोटामा मात्र सीमित गर्न नहुने बताएकी छन्। उनले महिलालाई खुला प्रतिस्पर्धामार्फत पनि नेतृत्वमा पुग्ने अवसर सिर्जना गर्नुपर्नेमा जोड दिएकी हुन्।

कांग्रेसको १५औँ महाधिवेशनको सन्दर्भमा गुरुङले समावेशी प्रतिनिधित्व आवश्यक भए पनि महिलाको क्षमता र नेतृत्वलाई कोटामै सीमित राख्नु उचित नहुने बताइन्। उनका अनुसार महिलाले खुला प्रतिस्पर्धामा पुरुषसँग समान रूपमा प्रतिस्पर्धा गर्ने वातावरण बनाउनुपर्छ।

उनले पार्टीभित्र महिलाको सहभागिता बढ्दै गए पनि निर्णय गर्ने तहमा अझै पर्याप्त प्रतिनिधित्व हुन नसकेको बताइन्। महिलालाई अवसर र जिम्मेवारी दिइएमा उनीहरूले प्रभावकारी रूपमा नेतृत्व गर्न सक्ने उनको भनाइ छ।

गुरुङले महिलाको राजनीतिक नेतृत्वलाई बलियो बनाउन पार्टीको संरचना र कार्यशैलीमा समेत परिवर्तन आवश्यक रहेको बताइन्। महिलालाई केवल आरक्षित पदमा सीमित नगरी खुला पदमा समेत प्रतिस्पर्धा गर्न प्रोत्साहित गर्नुपर्ने उनको जोड छ।

उनले कांग्रेसलाई समावेशी, लोकतान्त्रिक र सबै वर्ग तथा समुदायको प्रतिनिधित्व सुनिश्चित गर्ने पार्टीका रूपमा अघि बढाउनुपर्ने बताइन्।