केन्द्रीय सदस्यमा सर्वाधिक मत Nepalese Women -

असोज २९ , काठमाडौं । नेपाली कांग्रेसकी नेतृ बासना थापाले पार्टीको १५औँ महाधिवेशनबाट केन्द्रीय सदस्यमा सर्वाधिक मत प्राप्त गर्दै आफ्नो राजनीतिक प्रभाव थप बलियो बनाएकी छन्। जेनजी आन्दोलनपछि बदलिएको राजनीतिक परिवेशमा पार्टीभित्र युवाको सहभागिता र नयाँ नेतृत्वको बहस चलिरहेका बेला थापाको यो सफलतालाई महत्त्वपूर्ण उपलब्धिका रूपमा हेरिएको छ।

कांग्रेसको खुला महिलातर्फको केन्द्रीय सदस्य पदमा प्रतिस्पर्धा गरेकी थापाले कुल ५ हजार १९३ मत प्राप्त गरेकी छन्। यस समूहमा १५ जना केन्द्रीय सदस्य चयन हुने व्यवस्था थियो भने ३६ जना उम्मेदवार प्रतिस्पर्धामा थिए। थापाले सर्वाधिक मतसहित निर्वाचित हुँदै पार्टीभित्र आफ्नो स्थान थप मजबुत बनाएकी हुन्।

थापा लामो समयदेखि नेपाली कांग्रेसको राजनीतिमा सक्रिय रहँदै आएकी छन्। उनी १३औँ महाधिवेशनमा महाधिवेशन प्रतिनिधि बनेकी थिइन् भने १४औँ महाधिवेशनमा केन्द्रीय सदस्य पदमा प्रतिस्पर्धा गर्दा पराजित भएकी थिइन्। तर, त्यसपछि पनि उनले पार्टी संगठन निर्माण र राजनीतिक गतिविधिमा आफ्नो सक्रियता कायम राखिन्।

२०७४ सालको स्थानीय तह निर्वाचनमा दैलेखको नारायण नगरपालिकाको उपप्रमुख पदमा प्रतिस्पर्धा गरेकी थापा यसपटक प्रतिनिधिसभा सदस्यमा निर्वाचित भएकी हुन्। उनी दैलेख निर्वाचन क्षेत्र नम्बर १ बाट प्रत्यक्ष निर्वाचित हुँदै कर्णाली प्रदेशबाट प्रत्यक्ष निर्वाचनमार्फत प्रतिनिधिसभामा पुग्ने पहिलो महिला बनेकी छन्।

हाल कांग्रेस संसदीय दलको प्रमुख सचेतकको जिम्मेवारीसमेत सम्हालिरहेकी थापाले संसद् र पार्टी संगठन दुवै क्षेत्रमा सक्रिय भूमिका निर्वाह गर्दै आएकी छन्। जेनजी आन्दोलनपछि युवापुस्ताको राजनीतिक चासो र स्थापित दलहरूप्रतिको अपेक्षा बदलिएको उनको बुझाइ छ। युवा पुस्ताको ऊर्जा र अग्रज नेताहरूको अनुभवलाई एकसाथ अघि बढाउनुपर्नेमा उनले जोड दिँदै आएकी छन्।

केन्द्रीय सदस्यमा सर्वाधिक मतसहित निर्वाचित भएपछि थापाको जिम्मेवारी पनि थपिएको छ। पार्टीभित्रको गुटगत विवाद अन्त्य गर्दै संगठनलाई एकताबद्ध बनाउने, युवालाई राजनीतिमा आकर्षित गर्ने र कांग्रेसको सांगठनिक संरचनालाई गतिशील बनाउने चुनौती उनका अगाडि छन्।

महिला नेतृत्वले परम्परागत रूपमा पुरुषको वर्चस्व रहेको राजनीतिक क्षेत्रमा आफ्नो क्षमता प्रमाणित गरिरहेको सन्दर्भमा थापाको निरन्तरको सफलता नेपाली राजनीतिमा महिला सहभागिता र नेतृत्व विकासको महत्त्वपूर्ण उदाहरण बनेको छ।