एमाले स्थायी कमिटीमा पहिलोपटक सहभागी हुँदै विद्या भण्डारी

असोज २२ , काठमाडौं । नेकपा एमालेको स्थायी कमिटी बैठक आज बस्दैछ। दिउँसो १ बजे पार्टी केन्द्रीय कार्यालय च्यासलमा बस्ने बैठकमा पूर्वराष्ट्रपति तथा एमालेकी वरिष्ठ नेता विद्यादेवी भण्डारी पनि सहभागी हुँदैछिन्।

एमालेको वरिष्ठ नेता मनोनीत भएपछि भण्डारी पहिलोपटक स्थायी कमिटी बैठकमा सहभागी हुन लागेकी हुन्। एमालेको सचिवालय बैठकले उनलाई वरिष्ठ नेतामा मनोनीत गर्ने निर्णय गरेको थियो भने त्यसलाई केन्द्रीय कमिटी बैठकले अनुमोदन गरेको थियो।

पार्टी प्रचार विभाग प्रमुख नीरज आचार्यका अनुसार भण्डारी वरिष्ठ नेताको हैसियतमा बैठकमा सहभागी हुनेछिन्। राष्ट्रपति बन्नुअघि उनी एमालेकी उपाध्यक्ष थिइन्।

एमालेको महाधिवेशनपछि गठन भएको स्थायी कमिटीको यो पहिलो बैठक हो। बैठकमा समसामयिक राजनीतिक अवस्था तथा पार्टीका आगामी गतिविधिबारे छलफल हुने बताइएको छ। यद्यपि बैठकका विस्तृत एजेन्डा भने औपचारिक रूपमा सार्वजनिक गरिएको छैन।

वरिष्ठ नेताका रूपमा भण्डारीको स्थायी कमिटी बैठकमा सहभागितालाई एमालेको आगामी राजनीतिक तथा सांगठनिक गतिविधिमा उनको भूमिकाका दृष्टिले समेत चासोका साथ हेरिएको छ।