विश्वकप जिताएकी हरमनप्रीतले छाडिन् भारतीय महिला क्रिकेट टोलीको कप्तानी

असोज २० , काठमाडौं । भारतकी महिला क्रिकेट टोलीकी कप्तान हरमनप्रीत कौरले तीनै प्रारूपको कप्तानीबाट राजीनामा दिएकी छन्। उनले मंगलबार सामाजिक सञ्जालमार्फत तत्काल लागू हुने गरी कप्तानी छाडेको घोषणा गरेकी हुन्।

३७ वर्षीया हरमनप्रीतले सन् २०१६ देखि भारतीय टी–२० टोलीको नेतृत्व गर्दै आएकी थिइन्। सन् २०२२ मा एकदिवसीय टोलीको पूर्णकालीन कप्तानी सम्हालेकी उनी त्यसपछि तीनै प्रारूपकी कप्तान बनेकी थिइन्। उनले भारतका लागि ५ टेस्ट, ५१ एकदिवसीय र १५५ टी–२० अन्तर्राष्ट्रिय खेलमा कप्तानी गरेकी छन्।

उनको कप्तानीमा भारतले गत वर्ष पहिलोपटक महिला एकदिवसीय विश्वकपको उपाधि जितेको थियो। हालै सम्पन्न एसियाली खेलकुदमा पनि भारतले लगातार दोस्रोपटक महिला क्रिकेटमा स्वर्ण पदक जित्दा हरमनप्रीत नै टोलीकी कप्तान थिइन्।

कप्तानी छाड्ने निर्णय सहज नभएको बताउँदै हरमनप्रीतले टोलीका लागि आफूले आफ्नो व्यक्तिगत प्रदर्शन, विकास र महत्वाकांक्षासमेत धेरैपटक पछाडि राखेको उल्लेख गरेकी छन्। उनले आफूले कप्तानका रूपमा आफ्नो जिम्मेवारी पूरा गरेको महसुस भएको बताएकी छन्।

तर, उनले अन्तर्राष्ट्रिय क्रिकेटबाट भने सन्यास लिएकी होइनन्। हरमनप्रीतले तीनै प्रारूपमा भारतका लागि खेलिरहने स्पष्ट पारेकी छन्। “कप्तानी समाप्त भयो, यात्रा जारी छ,” भन्दै उनले अब खेलप्रतिको प्रेमका लागि पुनः खेल्न तयार रहेको बताएकी छन्।

हरमनप्रीतले कप्तानी छाडेपछि स्मृति मन्धाना नयाँ कप्तान बन्ने सम्भावना रहेको भारतीय सञ्चारमाध्यमहरूले उल्लेख गरेका छन्। नयाँ कप्तानबारे अन्तिम निर्णय भारतीय क्रिकेट नियन्त्रण बोर्ड (बीसीसीआई) ले गर्नेछ।