विपद् पुनर्निर्माणसँगै जलवायु उत्थानशीलतामा जोड, मन्त्री चौधरीको विश्व वन्यजन्तु कोषसँग छलफल

असोज २० , काठमाडौं । कृषि, वन तथा पर्यावरणमन्त्री गीता चौधरी र विश्व वन्यजन्तु कोष अमेरिकाका प्रतिनिधिबीच नेपालको पछिल्लो बाढी तथा विपद्, पुनर्निर्माण, जैविक विविधता संरक्षण र जलवायु उत्थानशीलताका विषयमा छलफल भएको छ।

मंगलबार मन्त्रालयमा भएको भेटवार्तामा वन तथा वन्यजन्तु व्यवस्थापन र आगामी सहकार्यका विषयमा समेत छलफल भएको मन्त्रालयले जनाएको छ। कोषका प्रमुख कार्यकारी अधिकृत लोराले विपद्को समयमा नेपाली जनता तथा सरकारसँग निरन्तर सहकार्य गर्ने प्रतिबद्धता व्यक्त गरेका छन्।

मन्त्री चौधरीले बाढीका कारण कृषि भूमि तथा वन क्षेत्रमा भएको क्षति र पुनर्निर्माणका चुनौतीबारे जानकारी गराउँदै पुनर्निर्माणसँगै दीर्घकालीन जलवायु तथा विपद् उत्थानशीलतालाई प्राथमिकता दिनुपर्ने बताइन्।

छलफलमा मानव–वन्यजन्तु द्वन्द्व बढ्दै गएको विषयलाई पनि प्राथमिकताका साथ उठाइएको थियो। बाघको संख्या बढेसँगै मानव–बाघ द्वन्द्व, जंगली हात्तीको समस्या तथा ५५ जिल्लामा देखिएको बाँदरको समस्या समाधानका लागि आधुनिक प्रविधि र वैज्ञानिक व्यवस्थापन आवश्यक रहेको मन्त्री चौधरीले बताइन्।

बाँदर व्यवस्थापनका लागि बन्ध्याकरण प्रविधि, हात्ती व्यवस्थापनका लागि विशेष परियोजना तथा मानवभक्षी बाघ व्यवस्थापनका लागि विशेष संरक्षण क्षेत्र स्थापना गर्ने सम्भावनाबारे समेत छलफल भएको छ।

विश्व वन्यजन्तु कोषले पाकिस्तानमा सन् २०२२ को बाढीपछि सञ्चालन गरिएका सिमसार पुनःस्थापना, प्रकृतिमा आधारित उत्थानशीलता तथा समुदाय संरक्षणका अनुभव नेपालमा पनि स्थानीय आवश्यकताअनुसार प्रयोग गर्न सकिने जनाएको छ।

मानव–हात्ती द्वन्द्व व्यवस्थापनका लागि जीईएफ–९ लगायत अन्तर्राष्ट्रिय वातावरणीय तथा जलवायु वित्त परिचालन गर्ने सम्भावनाबारे समेत छलफल भएको छ। दुवै पक्षले प्रकृति संरक्षण, समुदायको उत्थानशीलता र दिगो आर्थिक विकासलाई जोडेर आगामी सहकार्यलाई थप परिणाममुखी बनाउने सहमति गरेका छन्।