खुला महिला समूहमा सर्वाधिक मत Nepalese Women -

असोज २९ , काठमाडौं । नेपाली कांग्रेसकी नेतृ बसना थापाले पार्टीको १५औँ महाधिवेशनबाट केन्द्रीय सदस्यमा निर्वाचित हुँदै कांग्रेस राजनीतिमा आफ्नो प्रभाव थप बलियो बनाएकी छन्। खुला महिला समूहबाट प्रतिस्पर्धा गरेकी थापाले सर्वाधिक मत प्राप्त गर्दै केन्द्रीय सदस्यमा स्थान सुरक्षित गरेकी हुन्।

निर्वाचन समितिका अनुसार थापाले ५ हजार १९३ मत प्राप्त गरेकी छन्। ३६ जना उम्मेदवारबीच १५ सदस्यका लागि भएको प्रतिस्पर्धामा सर्वाधिक मत ल्याउनु उनको राजनीतिक यात्राको महत्त्वपूर्ण उपलब्धि बनेको छ।

थापा यसअघि नेपाली कांग्रेसको १३औँ महाधिवेशनमा महाधिवेशन प्रतिनिधि बनेकी थिइन्। तर १४औँ महाधिवेशनमा भने उनी सफल हुन सकेकी थिइनन्। त्यसपछि पार्टी संगठनमा सक्रिय रहँदै आएकी उनले जेनजी आन्दोलनपछि विकसित राजनीतिक परिस्थितिमा लगातार सफलता हासिल गर्दै आएकी छन्। उनी दैलेख निर्वाचन क्षेत्र नम्बर १ बाट प्रतिनिधिसभा सदस्यमा समेत निर्वाचित भएकी हुन्।

राजनीतिक परिवारमा जन्मिएकी थापाले भारतको भीमराव विश्वविद्यालयबाट समाजशास्त्रमा स्नातकोत्तर गरेकी छन्। विवाहपछि दैलेखको नारायण नगरपालिका निवासी बने पनि उनले राजनीतिप्रतिको आफ्नो सक्रियता कायम राखिन्। हाल उनी नेपाली कांग्रेस संसदीय दलकी प्रमुख सचेतकका रूपमा समेत जिम्मेवारी निर्वाह गरिरहेकी छन्।

थापाले पार्टीभित्र महिला र युवाको सहभागिता बढाउनुपर्ने तथा निर्णय गर्ने तहमा महिलाको अनिवार्य प्रतिनिधित्व सुनिश्चित गर्नुपर्ने धारणा राख्दै आएकी छन्। पार्टीका उपसभापति, महामन्त्रीजस्ता महत्त्वपूर्ण पदमा समेत महिलाको प्रतिनिधित्व हुनुपर्ने उनको जोड छ। महिलालाई नेतृत्वमा पुग्नबाट रोक्ने पुरानो सोच परिवर्तन गर्नुपर्ने उनको धारणा छ।

जेनजी आन्दोलनपछि नेपाली कांग्रेसभित्र नेतृत्व परिवर्तन, पुस्तान्तरण र संगठन सुधारको बहस तीव्र बनेको छ। यस्तो अवस्थामा थापाले प्राप्त गरेको मतलाई पार्टीभित्र महिला नेतृत्व र नयाँ पुस्ताप्रतिको विश्वासका रूपमा पनि हेरिएको छ।

थापाले आफ्नो विजयलाई व्यक्तिगत उपलब्धिमा मात्र सीमित नराखी आफूलाई विश्वास गर्ने पार्टीका कार्यकर्ता, युवा र महिलाको साझा जितका रूपमा लिएकी छन्। आगामी दिनमा पार्टीलाई एकताबद्ध बनाउँदै संगठनलाई गतिशील बनाउन सक्रिय भूमिका खेल्ने उनको प्रतिबद्धता छ।