डिनाको दाबी– अवसर पाए महिला नेतृत्वमा अब्बल सावित हुन्छन्

असोज २० , काठमाडौं । नेपाली कांग्रेसकी नेतृ महालक्ष्मी उपाध्याय ‘डिना’ले महिलालाई नेतृत्वको अवसर दिए उनीहरू सक्षम रूपमा जिम्मेवारी निर्वाह गर्न सक्ने बताएकी छन्। कांग्रेसको १५औँ महाधिवेशन जारी रहेका बेला उनले महामन्त्री पदमा उम्मेदवारी दिने घोषणा गरेकी हुन्।

डिना कांग्रेसको १४औँ महाधिवेशनबाट सहमहामन्त्रीमा निर्वाचित भएकी थिइन्। यसपटक भने उनले पार्टीको महामन्त्री पदमा प्रतिस्पर्धा गर्ने तयारी गरेकी हुन्।

उनले महिलाको राजनीतिक सहभागिता बढ्दै गए पनि नेतृत्व तहमा पुग्ने अवसर अझै पर्याप्त नभएको बताउँदै क्षमता प्रदर्शनका लागि महिलालाई समान अवसर आवश्यक रहेको धारणा राखेकी छन्।

कांग्रेसको १५औँ महाधिवेशनअन्तर्गत बन्दसत्र तथा निर्वाचन प्रक्रिया सुरु भएसँगै पदाधिकारी पदमा उम्मेदवारी दिने नेताहरूको संख्या बढिरहेको छ। डिनाको महामन्त्री पदमा उम्मेदवारीले कांग्रेसको नेतृत्व तहमा महिला प्रतिनिधित्वको बहसलाई पनि थप अगाडि ल्याएको छ।

कांग्रेसको महाधिवेशनमा महिलासहित विभिन्न समूहबाट नेतृत्वका लागि प्रतिस्पर्धा तीव्र बनेको छ। डिनाले आफूले महामन्त्रीको उम्मेदवारी घोषणा गरिसकेको बताउँदै नेतृत्वमा महिलाको उपस्थितिलाई थप बलियो बनाउने अवसरका रूपमा आफ्नो उम्मेदवारीलाई प्रस्तुत गरेकी छन्।