केन्यामा पहिलोपटक इबोला संक्रमण पुष्टि, संक्रमितको मृत्यु

असोज २० , काठमाडौं । केन्यामा पहिलोपटक इबोला संक्रमण पुष्टि भएको छ। स्वास्थ्य मन्त्री एडेन डुआलेका अनुसार प्रजातान्त्रिक गणतन्त्र कंगो ९डीआर कंगो० मा पछिल्ला सात वर्षदेखि बस्दै आएका एक केन्याली नागरिकमा इबोला संक्रमण पुष्टि भएको हो।

एक महिनाअघि बिरामी परेका ती व्यक्ति डीआर कंगोका विभिन्न अस्पतालमा उपचार गराएका थिए। त्यसपछि उनी सडकमार्फत युगान्डाको राजधानी कम्पाला पुगेका थिए र त्यहाँबाट शनिबार विमानमार्फत केन्याको राजधानी नैरोबी आएका थिए।

नैरोबी विमानस्थलमा सामान्य स्वास्थ्य जाँचपछि आफन्तले उनलाई अस्पताल लगेका थिए। पछि उनलाई कोभिड–१९ महामारीका बेला निर्माण गरिएको आइसोलेसन केन्द्रमा सारिएको थियो। उपचारका क्रममा उनलाई ज्वरो, चिसो लाग्ने, अत्यधिक थकान तथा कमजोरी, निल्दा दुख्ने, मांसपेशी दुख्ने र छालामुनि रक्तस्राव हुनेजस्ता लक्षण देखिएका थिए।

लक्षण र यात्राको इतिहासका आधारमा चिकित्सकले भाइरल हेमोरेजिक ज्वरोको आशंका गर्दै नमुना परीक्षण गरेका थिए। परीक्षणमा बुन्डिबुग्यो प्रजातिको इबोला भाइरस पुष्टि भएको स्वास्थ्य मन्त्री डुआलेले जानकारी दिएका छन्। संक्रमितको सोमबार राति  मृत्यु भएको छ।

स्वास्थ्य अधिकारीहरूले संक्रमितसँग सम्पर्कमा आएका परिवारका सदस्य तथा स्वास्थ्यकर्मीसहित कम्तीमा २८ जनाको पहिचान गरेका छन्। साथै उनीसँग एउटै विमानमा यात्रा गरेका थप २३ यात्रु र चार चालक दलका सदस्यको खोजी तथा निगरानी भइरहेको छ।

विश्व स्वास्थ्य संगठनका अनुसार बुन्डिबुग्यो प्रजातिको इबोला भाइरस देखिएयता हालसम्म ८ हजार ४६३ संक्रमणमध्ये ४ हजार ८२ जनाको मृत्यु भएको छ। यो प्रजाति अत्यधिक संक्रामक मानिन्छ।

बुन्डिबुग्यो प्रजातिका लागि हालसम्म स्वीकृत खोप वा उपचार उपलब्ध छैन। डीआर कंगोमा यस वर्ष इबोलाका कारण ४ हजारभन्दा बढी मानिसको मृत्यु भइसकेको बताइएको छ। युगान्डामा पनि संक्रमण देखिएपछि दुई जनाको मृत्यु भएको थियो, तर विश्व स्वास्थ्य संगठनले अगस्टमा युगान्डालाई इबोलामुक्त घोषणा गरेको थियो।