गर्भमा छोरीको लिंग परीक्षण गर्ने गिरोहविरुद्ध महिला अधिकारीको गोप्य अपरेसन

असोज २१ , काठमाडौं । भारतको कर्नाटकस्थित बागलकोटका महिला स्वास्थ्य तथा राजस्व अधिकारीहरूले गर्भमा रहेको शिशुको लिंग परीक्षण र भ्रूणहत्या गराउने आरोप लागेको गिरोहविरुद्ध गोप्य अपरेसन गरेका छन्। अधिकारीहरूले गर्भवती महिला र उनका आफन्तको भेषमा ग्राहक बनेर महाराष्ट्रको सीमावर्ती क्षेत्रमा पुग्दै अवैध गतिविधिको पर्दाफास गरेका हुन्।

बागलकोट प्रशासनले जमखण्डीका सहायक आयुक्त श्वेता भिडेकर, तहसिलदार गिरीश स्वाडी, स्वास्थ्य विभागकी अधिकारी शोभा ए, जिल्ला स्वास्थ्य अधिकारी डा। सुवर्णा कुलकर्णी लगायतको टोली बनाएको थियो। टोलीमा श्वेता गर्भवती महिला, डा। कुलकर्णी उनकी सासू र शोभा नन्दको भूमिकामा प्रस्तुत भएका थिए।

टोली महाराष्ट्रको जाडर बबलादी गाउँ पुगेपछि कथित बिचौलियामार्फत लिंग परीक्षणका लागि २ हजार भारतीय रुपैयाँ मागिएको थियो। रकम दिएपछि उनीहरूलाई करिब २० किलोमिटर टाढाको अर्को गाउँमा लगिएको थियो, जहाँ पोर्टेबल स्क्यानिङ मेसिनमार्फत परीक्षण गर्ने तयारी गरिएको थियो। त्यसपछि सुरक्षाकर्मीसहितको टोलीले छापा मारेर स्क्यानिङ मेसिन तथा अन्य उपकरण बरामद गरेको जनाएको छ।

घटनामा निखिल तेली, दानक्का तेली र कविता गोडेकरविरुद्ध महाराष्ट्रको उमादी प्रहरी थानामा मुद्दा दर्ता गरिएको छ। घटनाका कथित मुख्य योजनाकार सञ्जय वाघमोर फरार रहेको र प्रहरीले उनको खोजी गरिरहेको छ। प्रहरीले यसअघि पनि नेटवर्कमा संलग्न भएको आरोप लागेका व्यक्तिहरूको भूमिकाबारे अनुसन्धान गरिरहेको जनाएको छ।

भारतमा भ्रूणको लिंग पहिचान गरी त्यसका आधारमा गर्भपतन गराउने अभ्यास कानुनले प्रतिबन्धित गरेको छ। बागलकोट प्रशासनका अनुसार महिला अधिकारीहरूले ग्राहक बनेर गरेको यो पहिलो प्रकारको कारबाही भएको बताइएको छ।