असममा महिलासहित विकासका लागि ५० हजार करोड भारुको प्याकेज स्वीकृत

भदौ १५ , काठमाडौं । भारतको असम सरकारले महिला, स्वास्थ्य, शिक्षा, सडक तथा सार्वजनिक पूर्वाधार विकासका लागि ५० हजार करोड भारुको विकास प्याकेज कार्यान्वयन गर्ने ढाँचा स्वीकृत गरेको छ। असम मन्त्रिपरिषद्ले सोमबार उक्त प्रस्तावलाई स्वीकृति दिएको हो।

प्याकेजअन्तर्गत करिब १ हजार उच्च माध्यमिक विद्यालयको स्तरोन्नतिका लागि ७०० करोड भारु छुट्याइएको छ। त्यस्तै, बालबालिका तथा आमाका लागि सेवा सुविधा सुधार गर्ने उद्देश्यले करिब ६ हजार नयाँ आँगनवाडी केन्द्र स्थापना गर्ने योजना अघि सारिएको छ।

महिला सशक्तीकरणलाई लक्षित गर्दै असमका प्रत्येक विधानसभा निर्वाचन क्षेत्रमा दुईवटा महिला केन्द्रित बजार स्थापना गर्ने योजना पनि समेटिएको छ। प्रत्येक निर्वाचन क्षेत्रमा रंगशाला र सभागृह निर्माण गर्ने प्रस्तावसमेत प्याकेजमा राखिएको छ।

कुल रकममध्ये करिब ३० हजार करोड भारु नाबार्डमार्फत जुटाउने र बाँकी २० हजार करोड भारु राज्य सरकारको आफ्नै स्रोतबाट व्यवस्थापन गर्ने योजना छ।

सरकारका अनुसार यी परियोजनाहरू सन् २०२७ देखि चरणबद्ध रूपमा सुरु भई सात वर्षसम्म अर्थात् सन् २०३४ सम्म सञ्चालन हुनेछन्। प्याकेजमा शिक्षा, सामाजिक पूर्वाधार, खेलकुद, आवास र महिला केन्द्रित सुविधासहित विभिन्न क्षेत्रका योजना समावेश छन्।