त्रिपुरेश्वर बस आगलागीबारे संसद्मा प्रश्न, घटनाको छानबिन माग

असोज ६, काठमाडौं । त्रिपुरेश्वरमा बसभित्र आगलागी हुँदा चालकको मृत्यु भएको घटनाबारे प्रतिनिधिसभामा प्रश्न उठाइएको छ। सांसदहरूले घटनाको वास्तविक कारण पहिचान गरी जिम्मेवार पक्षबारे स्पष्ट छानबिन गर्न सरकारको ध्यानाकर्षण गराएका छन्।

सोमबार त्रिपुरेश्वरचोकस्थित बस स्टपमा रिद्धीसिद्धी यातायातको बा५ख ४२७४ नम्बरको बसमा आगलागी भएको थियो। घटनामा बस चालक २५ वर्षीय दावा लामा गम्भीर घाइते भएका थिए। उनको शरीरको करिब ९० प्रतिशत भाग जलेको थियो र उपचारका क्रममा कीर्तिपुरस्थित बर्न अस्पतालमा उनको मृत्यु भएको प्रहरीले जनाएको छ।

प्रहरीको प्रारम्भिक अनुसन्धानमा चालक आफैंले बसमा आगो लगाएको आशंका गरिएको छ। आगलागी हुनुअघि चालक र ट्राफिक प्रहरीबीच विवाद भएको बताइएको छ। यद्यपि घटनाको वास्तविक कारण र परिस्थितिबारे अन्तिम निष्कर्ष अनुसन्धानपछि मात्रै आउने प्रहरीले जनाएको छ।

घटनाको छानबिनका लागि काठमाडौं उपत्यका प्रहरी कार्यालय रानीपोखरीले एसएसपी रमेश बस्नेतको नेतृत्वमा समिति गठन गरिसकेको छ। समितिलाई पाँच दिनभित्र प्रतिवेदन बुझाउने जिम्मेवारी दिइएको छ।

यस घटनालाई लिएर संसद्मा समेत प्रश्न उठेपछि घटनाको निष्पक्ष छानबिन, चालकको मृत्युको कारण र आगलागी हुनुअघिको घटनाक्रमबारे स्पष्ट जानकारी सार्वजनिक गर्नुपर्ने माग गरिएको छ।