‘मैले त ग्यास पाएकी छैन, सर्वसाधारणको अवस्था के होला?’ : रोशनी मेचे

असोज १६, काठमाडौं । नेकपा एमालेकी राष्ट्रिय सभा सदस्य तथा मुख्य सचेतक रोशनी मेचेले बजारमा देखिएको महँगी र खाना पकाउने एलपी ग्यासको अभावप्रति सरकारको ध्यानाकर्षण गराएकी छन्। उनले आफूले समेत ग्यास पाउन नसकेको भन्दै सर्वसाधारणको अवस्था झन् कठिन हुन सक्ने बताएकी हुन्।

शुक्रबार राष्ट्रिय सभाको बैठकमा बोल्दै मेचेले चाडपर्व नजिकिँदै गर्दा दैनिक उपभोग्य वस्तुको मूल्य बढेको र बजारमा ग्यासको अभाव देखिएको बताइन्। उनले सरकार गठन भएपछि विकास निर्माणका काम प्रभावकारी रूपमा अघि बढ्न नसकेको र बजेट कार्यान्वयनमा समेत समस्या देखिएको दाबी गरिन्।

मेचेले सरकारबाट नागरिकले ठूलो अपेक्षा गरे पनि त्यसअनुसार काम हुन नसकेको बताउँदै सार्वजनिक सेवामा देखिएका समस्या समाधान गर्न सरकार गम्भीर हुनुपर्ने धारणा राखिन्। उनका अनुसार महँगी र अत्यावश्यक वस्तुको अभावले प्रत्यक्ष रूपमा सर्वसाधारण प्रभावित भइरहेका छन्।

उनले अर्थतन्त्र, सुशासन तथा सार्वजनिक सेवा प्रवाहसँग सम्बन्धित विषयमा समेत सरकारको ध्यानाकर्षण गराइन्। साथै, विपद् व्यवस्थापन, साइबर अपराधमा वृद्धि र संवैधानिक निकायसँग सम्बन्धित विषयमा पनि उनले सरकारको भूमिका प्रभावकारी बनाउनुपर्ने बताइन्।