३८ घण्टापछि जंगलबाट सकुशल उद्धार भइन् १० वर्षीया बालिका

असोज १८ , काठमाडौं । रुपन्देहीको तिलोत्तमाबाट अपहरणमा परेकी १० वर्षीया बालिकाको ३८ घण्टापछि प्रहरीले सकुशल उद्धार गरेको छ।

तिलोत्तमा–१७ दरखसवाकी बालिकालाई घरमै सुतिरहेको अवस्थामा बुधबार राति अपहरण गरिएको प्रहरीले जनाएको छ। बालिका हराएको थाहा पाएपछि परिवारले प्रहरीलाई खबर गरेका थिए। त्यसपछि प्रहरीले गाउँ तथा आसपासका जंगल क्षेत्रमा खोजी थालेको थियो।

प्रहरीका अनुसार शुक्रबार साँझ कान्छी बजारस्थित जंगलबाट बालिकाको सकुशल उद्धार गरिएको हो। बालिका भेटिएको स्थानमा फेला परेको मोबाइल फोनका आधारमा प्रहरीले अपहरणमा संलग्न भएको आरोपमा २७ वर्षीय युवराज थारुको पहिचान गरेको जनाएको छ।

थारुलाई आइतबार राति सोही क्षेत्रको जंगलबाट पक्राउ गरिएको प्रहरीले जनाएको छ। पक्राउ गर्ने क्रममा उनले प्रहरीमाथि आक्रमणको प्रयास गर्दै भाग्न खोजेपछि प्रहरीले एक राउन्ड गोली चलाएको थियो। गोली लागेर खुट्टामा चोट लागेका उनलाई उपचारका लागि लुम्बिनी प्रादेशिक अस्पताल लगिएको छ।

उद्धारपछि बालिकालाई सुरक्षामा राखेर स्वास्थ्य परीक्षण गरिएको प्रहरीले जनाएको छ। बालिकाले आफूलाई जंगलमा लैजाने व्यक्तिलाई नचिनेको बताएकी छन् भने आफूलाई दुर्व्यवहार गरिएको संकेतसमेत गरेको समाचारमा उल्लेख छ।

घटनाबारे प्रहरीले थप अनुसन्धान गरिरहेको जनाएको छ।