जाडो मौसमका लागि डिजाइनर राधा ढकालको ड्रेस सेन्स

पुस २, काठमाडौं । मौसमी पहिरनमा बिशेष ध्यानदिन सके व्यक्तित्व कहिल्यै घट्दैन । समय परिवर्तन संगै फेसन सेन्स पनि परिवर्तन गर्न सक्नु स्वयंमका लागि उपयोगि हुन्छ । अहिले जाडोले नेपालको भूगोल नै चिसिएको छ । कतै समान्य चिसो त कतै कठांग्रिने जाडो छ । काठमाडौंको चिसो छल्न विभिन्न डिजाइनका पहिरनमा ठाटिएर हिड्ने कलेजका युवायुवतीदेखि कामकाजी महिलापुरुष र गृहणी, सबै उमेर समुहले ड्रेस सेन्समा सचेत हुन सके कहिल्यै आफूले लगाएको पहिरनका कारण असहज महसुस गर्नुपर्ने अवस्था आउँदैन् । अहिले चिसो मौसममा फेसनमा कसरी सचेत हुने भन्ने विषयमा नेप्लिज वुमनसँग बिशाल बजारस्थित इगल आइज फेसन हाउसकी डिजाइनर राधा ढकालले गरेको कुराकानी । 

विन्टर सिजनका कस्ता पहिरनहरु तयार गर्दै हुनुहुन्छ ?

अहिले म ऊलन र जुटका पहिरनहरु तयार गरिरहेकी छु । नेपाली फेसन पारखिहरुले सबै भन्दा बढी शरीरलाई न्यानो प्रदान गर्ने पहिरन नै जाडोयाममा लगाउने हुनाले सोही प्रकारका पहिरन बनाउन व्यस्त छु । 

कुन रंगका पहिरनले जाडोमा न्यानोपना महसुस गराउँछ ?

डार्क, ब्लु, ब्ल्याक जस्ता रंगमा खेलेर तयार गरिएका पहिरन नै यो मौसमका लागि न्यानो महसुस गराउँछन् । यस्तै किसिमका पहिरनको माग पनि अहिले बढेको छ। 

विन्टर पहिरन र समर पहिरन तयार गर्दा पाइने फरकहरु कस्ता छन् ?

फरक छ, किनभने समरमा पातला पहिरन लगाउँदा गर्मी महसुस खासै हुँदैन् । तर जाडोमा अलिक बाक्ला र काठमाडौंको माइन्स डिग्री चिसोलाई छल्ने पहिरन लगाउनुपर्ने भएकाले हामी डिजाइनरले विन्टरका पहिरन भिन्दै र समरका भिन्दै प्रकारले तयार पार्छाै । यो मौसमको माग बमोजिम गर्ने गरिन्छ  र आवश्यक पनि छ । 

जाडो सिजनमा नै विवाहको सिजन पनि पर्ने भएकाले यति बेला कस्ता पहिरनको माघ बढी हुन्छ ?

हो जाडो मौसममा नै विवाहका लगन बढी जुर्ने हुँदा पहिरन बनाउँदा निकै ध्यान दिनुपर्छ । चिसो पनि छेक्ने लुक्स पनि आकर्षक देखिने किसिमका पहिरन तयार गर्नुपर्छ । अहिलेको समय भनेको आममानिस फेसनमा सचेत हुँदै गएकाले पनि यी सबै कुरालाई ध्यान दिएर डिजाइन तयार गरिन्छ । अहिले लेहेंगा, चोली, साडीहरुको नै बढी माग छ । यी नै पहिरनलाई मौसम अनुसार तयार पार्न हामी डिजाइनर सचेत हुन्छौं । 

डिजाइनरको हिसाबले ग्रहाकको लागि कस्तो टिप्स दिनुहुन्छ ?

मुख्यतः आफूलाई सुहाउँने खालका पहिरना नै ध्यान दिन सल्लाह दिन्छु । अरुले भनेको भरमा भन्दा आफूलाई लगाउँदा सहज हुने, आरामदायी हुने खालका पहिरन नै पहिलो रोजाइमा पर्नुपर्छ । अन्यथा लगाएको लुगाले स्वयंमलाई हिडडुल गर्न अप्ठेरो हुन्छ । काम गर्न सहज हुने खालका पहिरन नै उपयोगी हुन्छन् । आफूले लगाएका पहिरन हिड्नुभन्दा अगाडी म्याच गरेको छ कि छैन भनेर विचार पुर्याउनुपर्छ  । 
 

प्रस्तुतिः निशा धमला