जलवायु परिवर्तनले बढायो श्रमिक महिलाको संकट, प्रभावित समुदायलाई न्याय दिन माग

असोज १४, काठमाडौं । जलवायु परिवर्तनका कारण दैनिक जीवन र रोजगारीमा परेको असरबारे आवाज उठाउँदै प्रभावित समुदायलाई न्याय दिन माग गरिएको छ। काठमाडौंको वसन्तपुर दरबार क्षेत्रमा आयोजित जलवायु न्यायसम्बन्धी अभियान तथा दीप प्रज्वलन कार्यक्रममा जलवायु संकटको सबैभन्दा प्रत्यक्ष असर भोगिरहेका समुदायका समस्या सम्बोधन गर्न माग गरिएको हो।
कार्यक्रममा जलवायु परिवर्तनका कारण श्रमिक महिलाको दैनिक जीवन, रोजगारी र आम्दानीमा समेत असर परेको विषय उठाइएको थियो। प्राकृतिक विपद् बढ्दै जाँदा विशेषगरी सीमित स्रोतसाधनमा निर्भर श्रमिक समुदाय थप प्रभावित हुने भन्दै उनीहरूको अधिकार र सुरक्षालाई जलवायु नीतिको केन्द्रमा राख्नुपर्नेमा जोड दिइएको छ।
जलवायु संकटलाई केवल वातावरणीय समस्याका रूपमा नभई सामाजिक तथा आर्थिक न्यायसँग जोडिएको विषयका रूपमा लिनुपर्ने सहभागीहरूको भनाइ थियो। प्रभावित समुदायको क्षति तथा समस्याको उचित सम्बोधनसँगै उनीहरूलाई पुनःस्थापना र सुरक्षित जीवनयापनका लागि आवश्यक सहयोग उपलब्ध गराउनुपर्ने माग गरिएको छ।
कार्यक्रममार्फत जलवायु परिवर्तनको असर सबै समुदायमा समान नपर्ने र जोखिममा रहेका श्रमिक तथा सीमान्तकृत समुदायले बढी भार वहन गर्नुपर्ने अवस्था रहेको विषयमा ध्यानाकर्षण गराइएको थियो। जलवायु नीतिमा प्रभावित समुदायको सहभागिता र न्याय सुनिश्चित गर्नुपर्ने माग पनि उठाइएको छ।