छात्राको सुरक्षामा प्रश्न उठाउँदै निरमा विश्वविद्यालयमा ‘ब्ल्याक डे’ प्रदर्शन

असोज १६ काठमाडौं । अहमदाबादस्थित निरमा विश्वविद्यालयका छात्राहरूले छात्रावासमा सुरक्षासम्बन्धी गम्भीर घटना भएको भन्दै विश्वविद्यालय प्रशासनविरुद्ध ‘ब्ल्याक डे’ प्रदर्शन गरेका छन्।

बिहीबार छात्राहरूले कालो पोसाक लगाएर क्याम्पसमा धर्ना दिएका हुन्। उनीहरूले छात्रावास परिसरमा एक कामदारले छात्राहरूप्रति आपत्तिजनक व्यवहार गरेको भिडियो सार्वजनिक भएपछि पनि प्रशासनले पर्याप्त कदम नचालेको आरोप लगाएका छन्।

विद्यार्थीका अनुसार घटना निरमा विश्वविद्यालयको छात्रावास एच–४ नजिकै निर्माणाधीन एच–५ भवनमा भएको थियो। निर्माणस्थलमा रहेका एक कामदारले छात्राहरूप्रति अनुचित व्यवहार गरेको उनीहरूको आरोप छ। छात्रावासका बासिन्दाले उक्त विषय महिला सुरक्षा कर्मचारीलाई जानकारी गराउँदा कारबाही गर्नुको सट्टा छात्राहरूलाई छात्रावासमा छोटो कपडा नलगाउन सुझाव दिइएको उनीहरूले बताएका छन्।

घटनाबारे विश्वविद्यालय प्रशासनलाई समेत जानकारी गराइएको तर तत्काल कारबाही नभएको विद्यार्थीहरूको दाबी छ। उनीहरूका अनुसार सम्बन्धित व्यक्तिमाथि कारबाही गर्नुको सट्टा छात्रावास वरिपरि हरियो जाली लगाइएको थियो। प्रदर्शनकारी विद्यार्थीहरूले दोषीमाथि कारबाहीसँगै छात्रावासको सुरक्षा व्यवस्था सुधार गर्न माग गरेका छन्।

घटनापछि निरमा विश्वविद्यालयका प्रमुख सुरक्षा अधिकारीको उजुरीका आधारमा सोला प्रहरी थानामा एफआईआर दर्ता भएको छ। प्रहरीले घटनामा संलग्न अज्ञात व्यक्तिमाथि गुजरात प्रहरी ऐनका सम्बन्धित धाराअन्तर्गत मुद्दा दर्ता गरी पहिचानको प्रयास भइरहेको जनाएको छ।

यसैबीच, विद्यार्थी संगठन एनएसयूआईले एच–४ र एच–५ छात्रावासको सुरक्षा व्यवस्थाको समीक्षा तथा सीसीटीभी फुटेज जाँच गर्न माग गरेको छ। छात्राहरूले भने क्याम्पसमा महिला सुरक्षाको विषयलाई गम्भीर रूपमा सम्बोधन गर्नुपर्ने माग राखेका छन्।