मानिसहरू घर वा भँन्सामा प्रयोग हुने वस्तुलाई त्यति वास्ता गर्दैनन् । तर स्वास्थ्य र सौन्दर्यका दृष्टिले भान्सामा प्रयोग हुने तरकारी, फलफूल, काजु, ओखर एवं बदाम आदि उपयोगी हुन्छन् । यसबाट हामीले फिलिजिङ, टोनर, स्क्रव, फेसप्याक बनाएर दिनहँु, हप्ता वा महिना दिनमा प्रयोग गरी स्वस्थ र सुन्दर छाला प्राप्त गर्न सक्छौं । सौन्दर्य वृद्धि गर्न रसायन मिसाइएका सामानभन्दा घरमा भएका सामान प्रयोग गरे इन्फेक्सनको डर हुँदैन अनि समय र पैसाको पनि बचत हुन्छ ।
–बदाम तथा नरिवलको दूध र ओखरको तेललाई समान मात्रामा मिसाएर क्लिजिङ गर्न सकिन्छ ।
–दूध र टमाटर मिसाएर अनुहारमा लगाउन सकिन्छ । यसमा भिटामिन र मिनरल्स दुवै पाइन्छ । यसले क्लिजिङको काम गर्छ ।
–१/४ कप बन्दाको रसमा १/४ कप नरिवलको दूध र आधा चम्चा बदामको तेल मिसाएर बनाइएको मिश्रण अनुहार तथा घाँटीमा लगाएर मसाज गरेपछि पानीले पखाल्ने । यो क्लिजिङ जुनसुकै उमेरका लागि उपयुक्त हुन्छ ।
–१ चम्चा काजु पाउडर, १ चम्चा गुलाबको पेस्ट र दूध मिसाएर अनुहारमा लगाउने, हल्का हातले स्क्रव गर्ने । अन्त्यमा मनतातो पानीले धुने, छाला मुलाईम हुन्छ ।
–काँचो दूधमा कागतीको रस तथा नुन मिसाएर कपासले विस्तारै अनुहार तथा घाँटी सफा गर्ने । यसले छालालाई सफा र कोमल बनाउँछ ।
–एउटा सानो कागतीको रसमा २ चम्चा बदामको पाउडर र १ चम्चा मह मिसाएर अनुहार तथा घाँटीमा दली ५ मिनेटपछि पानीले धुने, यसले अनुहारमा भएको मृत छाला हटाउँछ ।
–१/४ कप दहीमा अलिकति ओखर पाउडर मिसाउने । यो मिश्रण हप्ताको एकपटक लगाए अनुहारमा चमक आउँछ ।
–अनुहारमा टोनरका लागि गाजर, काँक्रा, आलु तथा सुन्तलाको रस प्रयोगमा ल्याउन सकिन्छ ।
–टमाटर काटेर अनुहारमा लगाएर सुकेपछि हल्का मनतातो पानीले धुने । यसो गर्दा छालामा देखापर्ने चिल्लोपनबाट राहत पाइन्छ ।
–४ चम्चा मुल्तानी माटो, अढाइ चम्चा दही, एउटा टमाटर तथा १० थोपाजति सुन्तलाको रस हालेर पेस्ट बनाउने अनि १५ देखि २० मिनेटजति अनुहारमा लेप गरी राख्ने अनि मनतातो पानीले धुने । यसले अनुहारलाई कसिलो तथा चम्किलो राख्न मद्दत गर्छ ।
–आधा कपजति दूध, १ चम्चा मह तथा एउटा कागतीको रस मिसाएर पेस्ट बनाउने । कपासको सहयोगले अनुहारमा लगाउने । यो पेस्ट हप्तामा एकपटक लगाउनाले अनुहारमा चमक आउँछ ।
–अदुवाको रसमा नुन मिसाएर राति सुत्ने बेलामा अनुहारमा लगाउने र बिहान पखाल्ने । यसले अनुहारको दाग एवं फोहोरलाई हटाई छालालाई स्वस्थ राख्छ ।