जाडोमा केशको हेरचाह

माघ ८, काठमाडौं । जाडोमा स्काल्प सुख्खा हुन्छ जसले चायाँको समस्या बढाउँछ । यस्तो समस्यामा आयल मसाज राम्रो उपाय हो । तेल तताएर त्यसमा कागतीको रस हाली स्काल्प मसाज गर्नुपर्छ ।

केशलाई चायाँमुक्त बनाउन ताजा कागतीको एक चम्चा रसलाई केश धुने पानीमा मिसाउनुपर्छ र नुहाउनुभन्दा आधा घन्टाअघि दहीले केश मसाज गर्नुपर्छ । १५ मिनेट राखेर मनतातो पानीले पखाल्नुपर्छ । यो उपाय नियमित अपनाउँदा चायाँ हट्छ ।

राति सुत्ने बेलामा मनतातो नरिवलको तेलमा खाने कपूर मिसाएर केशको जरामा मसाज गरी बिहान उठेर स्याम्पु गर्नुपर्छ । एकदमै तातोपानीले केश धुनुहुँदैन ।

हेयर ड्रायर पनि सकेसम्म प्रयोग गर्नुहुँदैन । २ चम्चा ओलिभ आयल तताएर बिस्तारै केशको मसाज गर्दा तेल भित्रसम्म पुग्छ र केशलाई पोषण पुग्छ अनि चायाँ पर्ने र केश झर्ने समस्या कम हुन्छ । भिजेको केशलाई बाँध्दा समस्या अझ बढ्छ । दिनहु“ स्याम्पु प्रयोग गर्नुहुँदैन । स्वस्थ खाना खाने र प्रशस्त पानी पिउने बानी बसाल्नुपर्छ । 

सुन्दर केशका लागि 

• २ वटा अण्डामा २ चम्चा मह मिसाई राम्रोसँग ब्लेन्ड गरी केशमा लगाउने । सावर क्याप लगाई आधा घन्टापछि धुने । यसले केशलाई चम्किलो एवं स्वस्थ राख्नुका साथै झर्न पनि दिँदैन ।
• मेथीलाई रातभरि भिजाएर भोलिपल्ट पिस्ने । त्यसलाई तोरीको तेलमा मिसाई आधा घन्टा छोडी केशको जराका साथै पूरै केश मसाज गरी ३० मिनेटपछि मनतातो पानीले पखालेर स्याम्पु गर्ने ।

व्युटीसियन : रुपा बास्तोलासँगको कुराकानीमाआधारित टिप्स 
लेडि केयर व्युटी क्लिनिक संगीत चोक रातोघर, इटहरी ,सुनसरी