भिटामन सीले छालालाई चाउरीबाट जोगाएर सधैं जवान राख्छ

स्ट्रबेरी : यो भिटामिन सीले भरपुर हुन्छ । भिटामन सीले छालालाई चाउरीबाट जोगाएर सधैं जवान राख्न मद्दत गर्छ । भिटामिन सी कोलोजन निर्माणमा सहायक हुन्छ, जसले छालालाई सूर्यको तीव्र किरणको नकारात्मक प्रभावबाट जोगाउँछ । अमेरिकन जनरल अफ 
क्लिनिकल न्युट्रिसनको अनुसन्धानअनुसार स्ट्रबेरी एन्टी एजिङ हुन्छ । यसले बढ्दो उमेरसँगै छालामा देखापर्ने सुख्खापनबाट पनि छुटकारा प्रदान गर्छ । भिटामिन सीका अन्य स्रोत सुन्तला, ब्रोकाउली, रातो भेंडेखुर्सानी, मेवा आदि हुन् ।
 

गोलभेंडा : गोलभेंडालाई रातो रंग दिने तत्त्व (लाइकोपिन, एकप्रकारको केरोटेनाइड) मा छालालाई नरम तथा कोमल बनाउने गुण पनि पाइन्छ । अनुसन्धानअनुसार जुन व्यक्तिको छालामा गोलभेंडालाई रातो रंग प्रदान गर्ने तत्वको उपस्थिति पाइयो, तिनको छाला अरूको भन्दा कोमल थियो । लाइकोपिनको स्रोत तरबुजा र गाजर पनि हो ।
 

तोफु : तोफूले मात्र नभई अन्य सोया प्रोडक्ट्सले पनि छाला कसिलो राख्छन् र चाउरीबाट जोगाउँछन् । कारण यिनमा आइसो फ्लेवान्स हुन्छ जसले सूर्यको हानिकारक किरणबाट जोगाउँदै छालामा चाउरी पर्नबाट रोक्छन् । सोया मिल्क पनि यसको विकल्प हो ।
 

टुना माछा : यो माछा ओमेगा थ्री फेटी एसिडले भरिपूर्ण हुन्छ जसले छालालाई सधैं जवान राख्न मद्दत गर्छ । सालमन र सार्डिन माछा पनि यसको राम्रो स्रोत हो ।
 

दही : दैनिक एक कप दही सेवन गर्नाले छालाको दाग–धब्बा एवं चायाँ–पोतोबाट छुटकारा मिल्छ । दहीमा जिन्क तथा क्याल्सियम हुन्छ, जुन स्वास्थ्य र सौन्दर्य दुवैका लागि लाभदायक हुन्छ ।
 

किसमिस : यो एन्टी अक्सिडेन्ट त हो नै, यसमा प्रशस्त पोटासियम र आइरन पनि हुन्छ ।
 

गाजर : यसले छालाको बाहिरी लेयरलाई सुरक्षा प्रदान गर्छ र समयपूर्व बुढ्यौली आउनबाट जोगाउँछ ।
 

नट्स : अनेकन प्रकारका नट्स, चाहे त्यो बदाम होस् वा ओखर वा पहाडी बदाम यसले रोग प्रतिरोधक क्षमता बढाउनुका साथै फ्याट कम गरी स्लिम बनाउन मद्दत गर्छ । अमिनो एसिड भएका कारण यसले कोलेस्ट्रोल पनि कम गर्छ ।
 

लसुन : यसले टिस्युहरूको रक्षा गर्छ, जसबाट छालामा चाँडै चाउरी पर्दैन ।
 

सख्खरखण्ड : यो भिटामिन एको राम्रो स्रोत हो र भिटामिन ए एन्टी चाउरी एजेन्ट हो । यसले छालालाई कोमल बनाउँछ । 
 

स्याउ : स्याउ पनि एन्टी अक्सिडेन्ट हो र यसले घामको नकारात्मक असरबाट छालालाई जोगाउँछ । विशेषगरी यसले स्किन क्यान्सर उत्पन्न गराउने खतरनाक किरणबाट सुरक्षा प्रदान गर्छ ।
 

ओखर : यो एल्फा लाइनोलेनिक एसिड जुन ओमेगा थ्री फेटी एसिडकै एउटा प्रकार हो, बाट भरपुर हुन्छ । यसबाट छाला कोमल रहन्छ र त्यसलाई नरमपन प्राप्त हुन्छ ।
 

ओलिभ ओयल : यसमा एसेन्सियल फेटी एसिड हुन्छ । आफ्नो छाला नरम तथा कोमल रहोस् भन्ने चाहना छ भने आफ्नो दैनिक डाइटमा एक टेबल स्पुन ओलिभ ओयल समावेश गर्नुपर्छ । 
 

पानी : हाम्रो शरीरका कोषमा पानी नै हुन्छ, तर पानीको कमी भए छाला सुख्खा हुन पुग्छ । पानी प्रशस्त मात्रामा पिउनुपर्छ । यसले छालाको नरमपन कायम रहन्छ ।
 

ग्रीन टी : ग्रीन टी फ्रि र्‍याडिकल्ससित लड्न भिटामिन ईको तुलनामा दुई सय गुणा बढी लाभदायक छ । यसले शरीरभित्रबाट सफाइ गरी छाला पनि सफा राख्छ । यो ब्ल्याक हेड्ससित लड्न पनि सहायक हुन्छ ।
 

लो फ्याट मिल्क : यो क्याल्सियमबाट भरपुर हुन्छ र यसले हड्डी मात्र नभई बडी पोस्चरलाई पनि मजबुत र सही राख्छ । यसमा भएको प्रोटिनले छाला, केश एवं नङमा पनि चमक ल्याउँछ । यसमा भएको फस्फोरसले दाँतको स्वास्थ्य एवं सुन्दरता कायम राख्छ ।
 

डार्क चकलेट : वैज्ञानिकहरूका अनुसार यसमा ग्रीन टी र रेड वाइनभन्दा बढी एन्टी अक्सिडेन्ट हुन्छ । यसले छालाको रंगमा निखार ल्याउँछ । छालालाई सुकोमल बनाएर घामको नकारात्मक प्रभावबाट पनि जोगाउँछ ।
 

ब्रोकाउली : यसमा भएको एक प्रकारको एसिडले खुट्टामा कोलोजनलाई साह्रो हुनबाट रोक्छ, जसबाट सेल्युलाइट्स बन्न पाउँदैन र खुट्टाको सुन्दरता कायम रहन्छ ।
 

कफी : यो पनि एन्टी अक्सिडेन्ट्सले भरपुर हुन्छ । यसले सन ड्यामेजबाट छालालाई जोगाउँछ भने छाला झोल्लिन र चाउरी पर्नबाट पनि रोक्छ ।