बोनम्यारो रोगले ग्रस्त कल्पनालाई ११ लाख सहयोग

काठमाडौं। रातो मासी नबन्ने (बोनम्यारो) रोगले ग्रस्त कल्पना बाहिङलाई मनकारीहरूले ११ लाख १६ हजार ९ सय ८८ रुपैयाँ सहयोग गरेका छन् । उक्त रकम सहयोग संकलनकी संयोजक खुशी राईले राजधानीमा कल्पनालाई हस्तान्तरण गरेकी छन् ।

आर्थिक अभावका कारण बोनम्यारो प्रत्यारोपण गर्ने खर्च जुटाउन नसकेपछि १८ वर्षीया कल्पना मृत्युसँग संघर्ष गरिरहेकी थिइन् । प्रत्यारोपणमा लाग्ने करिब १४ लाख रुपैयाँमध्ये अपुग ११ लाख १६ हजार ९ सय ८८ रुपैयाँ देशविदेशमा रहेका नेपालीहरूले जुटाइदिएका हुन् । रकम प्राप्त गरेपछि कल्पनाले सबै सहयोगीहरूप्रति आभा व्यक्त गरिन् ।

उक्त सहयोग रकममध्ये ५ लाख ६३ हजार ४ सय ७७ रुपैयाँ बेलायतमा रहेका प्रवासी नेपालीहरुले उठाएको खुशीले हालै जानकारी दिइन् । त्यस्तै, १ लाख ९० हजार रुपैयाँ दक्षिण कोरियामा रहेका ८० नेपालीले उठाई पठाएका हुन् ।  त्यसै गरी हङकङमा रहेका ५१ नेपालीले १ लाख ७५ हजार ७ सय १४ रुपैयाँ संकलन गरी पठाए ।

त्यसबाहेक ३२ नेपालीसँग १ लाख ८७ हजार ७ सय ९७ रुपैयाँ आफूले संकलन गरेको खुशीले बताइन् । उनले यस अघि पटकपटक उपचार खर्च जुटाउन पहल गर्दै आएकी छन् । करिब चार वर्षअघि बोनम्यारो रोगले नै ग्रस्त ११ वर्षीया सरिता डीसीलाई बोनम्यारो प्रत्यारोपणका लागि अपुग ८३ हजार रुपैयाँ  संकलन गरेकी थिइन् । उनका अनुसार सरिता अहिले स्वस्थ छिन् । 

श्यामकला रोकालाई मृगौला प्रत्यारोपणका लागि अपुग ८३ हजार ३ सय १० रुपैयाँ संकलन गरेर दिएकी थिइन् । श्यामकलाको मृगौलाको सफल प्रत्यारोपण भइसकेको छ ।