फैसला कार्यान्वयन नभएको भन्दै युनिसाद्वारा न्याय र सुरक्षाको माग

असोज ६, काठमाडौं । अदालतबाट आफ्नो पक्षमा फैसला भएको एक वर्ष बितिसक्दा पनि कार्यान्वयन हुन नसकेको र आफू तथा आफ्ना दुई नाबालक सन्तानलाई ज्यान मार्ने धम्की आएको भन्दै सामाजिक अभियन्ता युनिसा भट्टराई कार्कीले न्याय र सुरक्षाको माग गरेकी छन्।

महिला तथा बालबालिकाको अधिकारका क्षेत्रमा क्रियाशील ‘परिवर्तनका लागि एकता’की संयोजकसमेत रहेकी युनिसाले मंगलबार विराटनगरमा पत्रकार सम्मेलन गर्दै विगत एक दशकदेखि आफूले घरेलु हिंसा, आर्थिक शोषण तथा पारिवारिक प्रताडना भोग्दै आएको बताइन्। उनले पछिल्लो समय अदालतको फैसला कार्यान्वयन गराउने क्रममा समेत आफू र माइती पक्षमाथि आक्रमणको प्रयास भएको दाबी गरिन्।

युनिसाले जिल्ला प्रशासन कार्यालय सुनसरी, जिल्ला प्रहरी कार्यालय, राष्ट्रिय मानव अधिकार आयोग र गृह मन्त्रालयसमक्ष आफू तथा आफ्ना सन्तानको सुरक्षाका लागि तत्काल निष्पक्ष छानबिन गर्न माग गरेकी छन्।

उनका अनुसार १६ वर्षको उमेरमा सुनसरीको बर्जु गाउँपालिका–४ का कृष्णबहादुर कार्कीसँग विवाह गरेपछि नै पारिवारिक विवाद सुरु भएको थियो। श्रीमान्को विवाहेत्तर सम्बन्धको विरोध गर्दा आफू घरेलु हिंसामा परेको र करिब १० वर्षअघि टाउकोमा प्रहार भएपछि आठवटा टाँका लगाउनुपरेको उनले बताइन्। उक्त घटनामा प्रहरीमा पुगे पनि परिवार र माइती पक्षको दबाबमा मिलापत्र गराइएको उनको भनाइ छ।

युनिसाले श्रीमान् वैदेशिक रोजगारीका क्रममा कतारमा रहेका बेला आफूले विराटनगरमा सिलाइकटाइ, गार्मेन्ट उद्योग र क्याफे सञ्चालन गरी दुई सन्तानको पालनपोषण तथा शिक्षाको खर्च जुटाएको बताइन्। श्रीमान् जेलबाट फर्किएपछि सम्पर्कविहीन बनेको र अर्कै व्यक्तिसँग सम्बन्धमा रहेको दाबी गर्दै आफू कानुनी प्रक्रियामा जान बाध्य भएको उनले बताइन्।

ससुरा उदयबहादुर कार्कीसहित विपक्षी रहेको अंश तथा मानाचामलसम्बन्धी मुद्दामा सुनसरी जिल्ला अदालतले आफ्नो पक्षमा फैसला गरेको युनिसाले बताइन्। अदालतको आदेशअनुसार मालपोत कार्यालय इनरुवामार्फत जग्गा रोक्का राखिएको र फैसला कार्यान्वयनका लागि अदालतको डोर टोलीसमेत खटिएको उनको भनाइ छ।

उनका अनुसार २०८२ असोज ४ गते बण्डा छुट्याउने क्रममा प्राविधिक विषयमा विवाद भएपछि आफूसहित माइती पक्षमाथि गालीगलौज र हातपातको प्रयास भएको थियो। घटनापछि आफूहरू प्रहरीको सहयोगमा त्यहाँबाट बाहिरिएको उनले बताइन्।

युनिसाले स्थानीय प्रशासन, वडा कार्यालय र प्रहरीसमेत प्रभावमा परेको आरोप लगाउँदै फैसला कार्यान्वयनमा ढिलाइ भइरहेको दाबी गरिन्। आफूविरुद्ध समूह बनाएर झुटा उजुरी दिने गरिएको आरोपसमेत उनले लगाइन्। यद्यपि, यी आरोपबारे सम्बन्धित पक्षको धारणा तथा स्वतन्त्र पुष्टि समाचारमा समावेश छैन।

पत्रकार सम्मेलनमा भावुक हुँदै युनिसाले आफूलाई वर्षौंदेखि ‘स्ट्रङ लेडी’को रूपमा चिनिए पनि अहिले कानुनी अधिकार र सुरक्षाका लागि सार्वजनिक रूपमा आवाज उठाउन बाध्य भएको बताइन्। उनले आफूले प्रस्तुत गरेका दाबी गलत प्रमाणित भए कानुनी सजाय भोग्न तयार रहेको उल्लेख गर्दै निष्पक्ष छानबिन र आफू तथा आफ्ना नाबालक सन्तानका लागि सुरक्षित वातावरणको माग गरिन्।