रेस्मिका हत्या प्रकरणमा पक्राउ परेका तीनै जनाले पाए अदालतबाट सफाइ

असोज ६, काठमाडौं । खोटाङकी २६ वर्षीया रेस्मिका परियारको हत्या प्रकरणमा पक्राउ परेका तीन जनालाई जिल्ला अदालत खोटाङले सफाइ दिएको छ। जिल्ला न्यायाधीश फणीन्द्रप्रसाद पराजुलीको एकल इजलासले हेमन परियार, दीपक राई र दीपक श्रेष्ठलाई घटनामा दोषी नदेखिएको भन्दै सफाइ दिएको हो। उनीहरूलाई गत जेठ १२ गते पक्राउ गरिएको थियो।

रेस्मिका गत वर्ष भदौ ३० गते मृत अवस्थामा फेला परेकी थिइन्। स्थानीय अजम्बरी साना किसान कृषि सहकारी संस्थामा कार्यरत उनी पञ्चमी बजारस्थित कार्यालयबाट घर फर्कने क्रममा मार्से सामुदायिक वनमा हत्या भएको प्रहरीले जनाएको थियो। घटनामा संलग्न आरोपमा १६ वर्षीय एक किशोरलाई यसअघि नै पक्राउ गरिएको थियो।

एक जना मात्रै व्यक्तिले घटना गराउन नसक्ने भन्दै रेस्मिकाका आफन्तले थप व्यक्तिको संलग्नता रहेको दाबी गर्दै उच्च अदालत ओखलढुंगामा जाहेरी दिएका थिए। उक्त जाहेरीपछि उच्च अदालतको आदेशका आधारमा थप तीन जनालाई पक्राउ गरी अनुसन्धान अघि बढाइएको थियो।

तीनै जनाले अदालतबाट सफाइ पाएपछि रेस्मिकाका परिवार तथा आफन्तले अदालत परिसरमा विरोध जनाएका छन्। उनीहरूले दोषीलाई उन्मुक्ति दिइएको आरोप लगाउँदै अदालतको गेटमा नाराबाजीसमेत गरेका थिए।