किशोरीको पहलमा विज्ञान अनुसन्धान कार्यक्रम, ६६ छात्राले लिए सहभागिता

असोज ६, काठमाडौं । सिंगापुरमा किशोरीहरूले नै आयोजना गरेको दुईमहिने विज्ञान अनुसन्धान कार्यक्रममा १३ विद्यालयका ६६ छात्राले सहभागिता जनाएका छन्। विज्ञान, प्रविधि, इन्जिनियरिङ तथा गणित अर्थात् एसटीईएम क्षेत्रमा छात्राहरूको रुचि बढाउने उद्देश्यले ‘इन्टेगर्ल्स सिंगापुर विज्ञान अनुसन्धान कार्यक्रम’ सञ्चालन गरिएको हो।

गत जुलाईको सुरुदेखि सेप्टेम्बरसम्म सञ्चालन भएको कार्यक्रममा १६ र १७ वर्ष उमेरका पाँच छात्राले नेतृत्व गरेका थिए। उनीहरूले विश्वविद्यालयका प्राध्यापक तथा विभिन्न क्षेत्रका विज्ञलाई मार्गदर्शकका रूपमा जोडेर सहभागी छात्रालाई विद्यालयको पाठ्यक्रमभन्दा बाहिर रहेर वास्तविक अनुसन्धानको अनुभव दिलाएका थिए।

कार्यक्रममा सहभागी छात्राहरूले विभिन्न विषयमा अनुसन्धान गरेका थिए। केही समूहले आणविक संलयनसम्बन्धी अध्ययन गरेका थिए भने केहीले सिंगापुरका स्थानीय वन्यजन्तु, विशेषगरी ऊदबिलावको व्यवहारबारे अनुसन्धान गरेका थिए। खाद्य फोहोरबाट प्राप्त हुने प्रतिअक्सिडेन्टले पटक–पटक तताइएको खाना पकाउने तेलमा पार्ने प्रभावबारे समेत अध्ययन गरिएको थियो।

आयोजकका अनुसार कार्यक्रममा छात्राहरूलाई अनुसन्धान, समूहगत कार्य, सञ्चार, जिम्मेवारी तथा समस्या समाधानजस्ता सीप विकास गर्ने अवसर मिलेको थियो। कार्यक्रमको अन्त्यमा सहभागीहरूले सेप्टेम्बर ५ मा आफ्ना अनुसन्धानका निष्कर्ष सार्वजनिक गरेका थिए।

सिंगापुरमा सन् २०२४ मा विज्ञान, प्रविधि, इन्जिनियरिङ तथा गणितसम्बन्धी रोजगारीमा महिलाको सहभागिता ३५ प्रतिशत पुगेको थियो, जुन सन् २०१४ को २९ प्रतिशतभन्दा बढी हो। आयोजकहरूले यस्ता कार्यक्रममार्फत छात्राहरूलाई एसटीईएम क्षेत्रमा अध्ययन तथा करियरका अवसरबारे प्रत्यक्ष अनुभव दिलाउने प्रयास गरिएको बताएका छन्।

कार्यक्रममा सहभागी एक छात्राले अनुसन्धान कार्यक्रमले एसटीईएमसम्बन्धी विषयमा उच्च शिक्षा तथा करियर बनाउने आफ्नो रुचि थप बढाएको बताएकी छन्। कार्यक्रमका मार्गदर्शकहरूले पनि कम उमेरमै छात्राहरूले आफ्नै पहलमा यस्तो अनुसन्धान कार्यक्रम आयोजना गर्नु सकारात्मक रहेको बताएका छन्।