रासायनिक मल खरिद गर्न सरकारलाई १० अर्बको स्रोत सहमति

असोज ६, काठमाडौं । आगामी सिजनमा किसानलाई आवश्यक पर्ने रासायनिक मलको सहज आपूर्ति सुनिश्चित गर्न सरकारले खरिद प्रक्रिया अघि बढाउने भएको छ।

कृषि, वन तथा पर्यावरण मन्त्री गिता चौधरीको पहलमा आगामी सिजनका लागि रासायनिक मल खरिद गर्न अर्थ मन्त्रालयबाट १० अर्ब रुपैयाँ बराबरको स्रोत सहमति प्राप्त भएको हो।

स्रोत सहमति प्राप्त भएपछि उक्त रकमबाट आवश्यक परिमाणमा रासायनिक मल खरिदका लागि बोलपत्र आह्वान गर्ने प्रक्रिया अघि बढाइने मन्त्रालयले जनाएको छ। खेतीको मुख्य सिजनमा किसानले मल अभाव व्यहोर्न नपरोस् भन्ने उद्देश्यले समयमै खरिद प्रक्रिया पूरा गर्न मन्त्री चौधरीले सम्बन्धित निकायलाई निर्देशन दिएकी छन्।

मन्त्री चौधरीले रासायनिक मलको व्यवस्थापनलाई प्राथमिकतामा राख्दै आपूर्ति प्रणालीमा ढिलाइ हुन नदिन आवश्यक तयारी गर्नसमेत निर्देशन दिएकी छन्।

सरकारले खरिद प्रक्रिया समयमै सम्पन्न गरी आगामी सिजनमा किसानलाई आवश्यक रासायनिक मल सहज रूपमा उपलब्ध गराउने लक्ष्य लिएको छ।