बंगलादेशलाई हराउँदै पाकिस्तानले जित्यो एसियाडमा कांस्य

असोज ६, काठमाडौं । जापानमा जारी एसियाली खेलकुद २०२६ अन्तर्गत महिला क्रिकेटमा पाकिस्तानले कांस्य पदक जितेको छ। तेस्रो स्थानका लागि मंगलबार भएको खेलमा पाकिस्तानले बंगलादेशलाई ३१ रनले पराजित गर्दै कांस्य पदक पक्का गरेको हो।

टस जितेर पहिले ब्याटिङ गरेको पाकिस्तानले निर्धारित २० ओभरमा ८ विकेट गुमाएर १४५ रन बनाएको थियो। पाकिस्तानकी कप्तान फातिमा सनाले ३० बलमा अविजित ४५ रन बनाउँदै टोलीको इनिङ्स सम्हालिन्। उनले तीन चौका र तीन छक्का प्रहार गरिन्। गुल फिरोजाले ३१ तथा आलिया रियाजले २५ रनको योगदान दिइन्।

१४६ रनको लक्ष्य पछ्याएको बंगलादेशले निर्धारित २० ओभरमा ७ विकेट गुमाएर ११४ रन मात्र बनाउन सक्यो। शर्मिन अख्तरले अविजित ४६ रन र कप्तान निगार सुल्तानाले २५ रन बनाए पनि टोलीलाई जितसम्म पुर्‍याउन सकेनन्।

पाकिस्तानका लागि उम्मे–हानीले चार ओभरमा १० रन दिएर तीन विकेट लिइन्। त्यसबाहेक तस्मिया रुबाब, फातिमा सना, नशरा सन्धु र आयशा जफरले एक–एक विकेट लिए।

यस जितसँगै पाकिस्तानले एसियाली खेलकुदको महिला क्रिकेटमा कांस्य पदक हासिल गरेको छ।