झरीको मेकअप

असार २०, काठमाडौं। मनसुनको रिमझिमसँगै आफ्नो सौन्दर्य स्याहारमा ध्यान दिनुपर्छ । त्यसका लागि मौसम सुहाउँदो मेकअप गर्नुपर्छ :
 

वाटर प्रुफ मेकअप
वाटर प्रुफ मेकअप यो मौसममा सुहाउँदो हुन्छ । वाटर प्रुफ नभए मेकअप चाँडै बग्नुका साथै रोमछिद्र खुल्ला हुनाले छालामा मैलो जम्ने, पिम्पल, एक्ने देखिने सम्भावना बढ्छ । मेकअप गर्नुअघि आफ्नो छालाको प्रकृति थाहा पाउनुपर्छ ।
तैलीय छालामा मेकअप गर्नुपूर्व छालालाई सही तरिकाले सफा गर्नुपर्छ । छाला सफा गर्न क्रिम बेस क्लिन्जर प्रयोग गर्नुहुँदैन । वाटर बेस क्लिन्जरको प्रयोग उपयुक्त हुन्छ । क्लिन्जरले मुहारका साथै घाँटीमा पनि पुछ्नुपर्छ । त्यसपछि मुहारमा भएको दाग–धब्बालाई कन्सिलर प्रयोग गरी कन्सिल गर्नुपर्छ । त्यसपछि फाउन्डेसन लगाउनुपर्छ । फाउन्डेसन केक बेस हुनुपर्छ, लिक्विड बेस उचित हुँदैन । फाउन्डेसनको बेस पातलो रहनुपर्छ ।
 

राम्रो परिणामका लागि
लाइनर तथा मस्काराका लागि पनि वाटर प्रुफ पेन्सिल प्रयोग गर्नुपर्छ । यसले पसिना वा वर्षाका कारण मेकअप फैलने डर रहँदैन । आँखा ठूलो छ भने पातलो र आँखा सानो छ भने मोटो लाइनर लगाउनुपर्छ । मनसुनको आइस्याडो लिक्विड बेस हुनु हुँदैन । हल्का कलरको पाउडर आइस्याडो नै प्रयोग गर्नुपर्छ । यसको पनि पातलो कोट लगाउनुपर्छ । लिपिस्टिक लगाउनुअघि आउट लाइन बनाए परिणाम राम्रो आउँछ । लिपिस्टिक ब्रस तथा स्टिकर विन्दीको प्रयोग उपयुक्त हुन्छ । कुन्दन वा नग भएको डेकोरेटेड बिन्दी पनि लगाउन सकिन्छ ।
मनसुनमा लाइट एवं मेट फिनिस मेकअप नै सुहाउँछ, ग्लसी वा सिमरी मेकअप गर्नुहुँदैन ।