आर्थिक क्षमताका लागि समुदायमा रहेका महिलाहरूको ऐक्यबद्धता लोभलाग्दो

हेटौंडा। पछिल्लो समयमा समुदायका महिलाको पहुँच एवं सशक्तता बढ्दो छ । महिलाहरू विभिन्न पेसा र क्षेत्रमार्फत आफूलाई परिस्कृत र परिमार्जित गर्दैछन् । सामाजिक, राजनीतिक, आर्थिक क्षमताका लागि समुदायमा रहेका महिलाहरूको ऐक्यबद्धता लोभलाग्दो छ । विभिन्न समूह बनाएर उनीहरू आफ्नो सीप र क्षमतालाई आयआर्जनतर्फ लक्षित गरिरहेका छन् । यस्तै जुझारु महिलाहरूको समूह हेटौंडा चेली समाज अहिले समाजमा उल्लेखनीय योगदान दिइरहेको संस्था हो ।

वि.सं. २०६४ सालमा स्थापित यो सामाजिक संस्था विशुद्ध सेवाभावले खोलिएको समूह हो । मकवानपुर जिल्ला लक्षित हेटौंडा चेली समाजले जिल्लामा नि:शुल्क स्वास्थ्य शिविर, गरिब तथा असहाय महिलाको स्वास्थ्योपचार, विपत् व्यवस्थापन तथा सहयोगका साथै भूकम्पपीडितका लागि खाद्यान्न एवं कपडा सहयोग गरिसकेको छ । समूहकी अध्यक्ष मीरा कार्की भन्छिन्–सुरुवाती दिनमा हामीले व्यक्तिगत खर्चमा सामाजिक सेवामा पहल गर्‍यौं ।

पछिल्लो समयमा आफ्नो सीप परिचालन गर्दै आयमूलक काममा पनि हात हालेका छौं । ८० सदस्यीय हेटौंडा चेली समाजले पछिल्लो समयमा नयाँ कामको सुरुवात गरेको छ । समूहद्वारा सञ्चालित स्वर्ण उत्सव नामक अभियानले विवाह, व्रतबन्ध एवं पास्नीका लागि आवश्यक सामग्री बिक्री गर्छ । त्यति मात्र होइन यो संस्थाले यस्ता सामग्री भाडामा दिनुका साथै बाजा व्यवस्थापन, साइपाटा सजाउने काम पनि गर्छ । जग्गे, गेट तथा गाडी डेकोरेसन गर्ने काममा समेत उनीहरू अब्बल छन् । समूहकी उपाध्यक्ष भानु मल्लले भनिन्–‘हाम्रो काम एकपटक हेर्नेले दोहोर्‍याएर बोलाउँछन् । हामी गुणस्तरीयतामा विश्वास गर्छौं ।’ साइपाटाको लोभलाग्दो सजावट, जग्गे र गेटको सिंगारपटार, आकर्षक पास्नीका सामग्री हेटौंडा चेली समाजद्वारा सृजित विशेष सिर्जना हुन् । समूहकी सदस्य मैंया स्थापितका अनुसार यसरी सिंगार्ने काममा उनीहरू स्वयं खटिन्छन् ।

समूहले धेरैलाई रोजगार प्रदान गर्नुका साथै गृह निर्मातृहरूको सीपलाई पनि आर्थिक क्रियाकलापतर्फ डोर्‍याएको छ ।