तिशा शाक्य बनिन् १९औँ संस्करणकी मिस नेवाः

भदौ ९ , काठमाडौं । ललितपुरकी तिशा शाक्यले १९औँ संस्करणको मिस नेवाः उपाधि जितेकी छन्। १६ जना फाइनलिस्टलाई पछि पार्दै उनले उपाधिसँगै १ लाख रुपैयाँ नगदसहित विभिन्न पुरस्कार प्राप्त गरिन्।
तिशाले मुख्य उपाधिसँगै गोदावरी नगरपालिकाको उत्कृष्ट नेपाल भाषा सहविधा पनि जितेकी छन्। सारिका महर्जन प्रथम उपविजेता र जेसिका श्रेष्ठ द्वितीय उपविजेता घोषित भए।
काठमाडौं महानगरपालिकाकी उपप्रमुख तथा पूर्वमिस नेवाः सुनिता डंगोल प्रतियोगिताको फिनालेमा प्रमुख अतिथिका रूपमा सहभागी भएकी थिइन्। फेसन डिजाइनर ज्ञानीशोभा तुलाधर मुख्य निर्णायक रहेको प्रतियोगितामा लक्ष्मण महर्जन, जीवेश्वरलाल श्रेष्ठ, अनिल स्थापित, रोहन श्रेष्ठ, स्वरूपा श्रेष्ठ र प्रा। दिव्यलक्ष्मी बज्राचार्य निर्णायक थिए।
आयोजक नेप्लिज फेसन होमकी अध्यक्ष हेमा मानन्धरका अनुसार प्रतियोगिताको उद्देश्य नेवाः समुदायको भाषा, संस्कृति, कला र सामाजिक चेतनाको प्रवर्द्धन गर्नु हो।
प्रतियोगिता रोजिन शाक्यको कोरियोग्राफी तथा सञ्चालनमा सम्पन्न भएको थियो। कार्यक्रमको सह–संयोजन मिस नेवाः प्रलिशा शाक्य र मिस नेवाः सामाजिक कल्याण सद्भावना दूत प्रमुख तिमिला महर्जनले गरेका थिए। त्यस्तै, मिस नेवाः सकिना महर्जन र कृषा महर्जनले कार्यक्रम संयोजन गरेका थिए।