जानकी तामाङको अन्तर्राष्ट्रिय चमक, तेक्वान्दोमा तीन स्वर्ण

भदौ १० , काठमाडौं । नेपालकी तेक्वान्दो खेलाडी जानकी तामाङले भारतको हैदराबादमा सम्पन्न प्रथम वर्ल्ड ओपन तेक्वान्दो च्याम्पियनसिप–२०२६ मा तीन स्वर्ण पदक जितेकी छन्।

चन्द्रागिरि नगरपालिका–१५ स्थित डायनामिक तेक्वान्दो डोजाङकी तामाङले पुम्सेको एकल, जोडी र समूह स्पर्धामा स्वर्ण जितेकी हुन्।

अगस्ट २१ देखि २३ सम्म हैदराबादको जीएमसी बालायोगी इन्डोर स्टेडियममा भएको प्रतियोगितामा २४ देशका खेलाडी सहभागी थिए। प्रतियोगितामा क्योरुगी, पुम्से, पेयर पुम्से, टिम पुम्से र फ्रिस्टाइललगायत विधामा प्रतिस्पर्धा भएको थियो।

तामाङले एउटै अन्तर्राष्ट्रिय प्रतियोगितामा तीन स्वर्ण जित्दै नेपालको तेक्वान्दोमा उल्लेखनीय उपलब्धि हासिल गरेकी छन्। उनको सफलताले चन्द्रागिरिमा तेक्वान्दो खेलको विकास तथा खेलाडी उत्पादनमा भइरहेका प्रयासलाई थप उत्साह दिएको डोजाङले जनाएको छ।

डोजाङका अनुसार तामाङको उपलब्धि निरन्तर प्रशिक्षण, अनुशासन र मेहनतको परिणाम हो। उनको सफलताप्रति प्रशिक्षक, अभिभावक तथा डोजाङ परिवारले खुसी व्यक्त गरेका छन्।