अब महिला स्वास्थ्य स्वयंसेवि र कर्मचारीका सन्तानलाई स्वास्थ्य विषय पढ्न छात्रवृत्ति दिने

काठमाडौं। स्वास्थ्य मन्त्री गगन थापाले स्वास्थ्य क्षेत्रमा ठूलो योगदान पुर्‍याइरहेका महिला स्वास्थ्य स्वयंसेविका र स्वास्थ्य मन्त्रालय मातहतका कर्मचारीका सन्तानलाई स्वास्थ्य विषय पढ्न छात्रवृत्ति दिने तयारी भइरहेको बताएका छन् । स्वास्थ्य सेवा दिवसका अवसरमा बोल्दै मन्त्री थापाले सिटिइभिटीबाट प्रदान गरिने छात्रवृत्तिको पाँच प्रतिशत स्वयंसेविकाको छोराछोरी र पाँच प्रतिशत कर्मचारीका छोराछोरीका लागि छुट्याइएको बताए ।

सिटिइभिटी अन्तर्गत पढाइ हुने विषयका लागि दिइने छात्रवृत्तिमा बाँकी पाँच प्रतिशत मन्त्रालय अन्तर्गत काम गर्ने स्वास्थ्यकर्मीका छोराछोरीले पाउनेछन् । उनले भने, ‘उहाँहरुले स्वास्थ्य क्षेत्रमा पुर्याउनुभएको योगदान स्वरुप यो व्यवस्था गर्न लागिएको हो ।’

यसैगरी स्वास्थ्य मन्त्रालय अन्तर्गत काम गर्ने चिकित्सकलाई पोष्ट ग्य्राजुएट (पीजी)का लागि छात्रवृत्ति दिए जस्तै अनमी, अहेव र नर्सलाई छात्रवृत्ति दिइने बताए । उनले भने, ‘अनमीलाई स्टाफ नर्स पढ्न, अहेवलाई एच पढ्न र स्टाफ नर्सलाई थप पढ्न छात्रवृत्तिको व्यवस्था गरिनेछ।’
 

स्वास्थ्य सेवालाई प्रभावकारी बनाउन कर्मचारीको मनोबल उच्च हुनु जरुरी भएको भन्दै यस्ता सेवा सुविधा दिइने तयारी गरिएको बताएका हुन् ।