द्वन्द्वपीडित कृष्णकुस्मी थारू बनिन् नगर उपप्रमुख

बर्दिया। बर्दिया जिल्लाको ठाकुरबाबा–४ बरगदाकी कृष्णकुस्मी थारू ठाकुरबाबा नगरपालिकामा उपप्रमुख चुनिएकी छन् । उनलाई माओवादी केन्द्रले उम्मेदवार बनाएको हो ।

ठाकुरबाबा–४ बरगदाकी ३५ वर्षीया थारूले १ सय ११ मतान्तरले एमालेकी बिना भट्टराईलाई हराइन् । उनले ७ हजार ८६ मत ल्याइन् । विवाह गरेको दुई वर्षमै पतिको हत्या भए पनि उनले हरेस खाइनन्, भूमिगत भएर पार्टीको काममा निरन्तर खटिइन् । त्यही संघर्ष र लगनशीलले उनलाई उपप्रमुखको कुर्सीमा पुर्‍याएको छ । दुईमहिने छोराको उपचारका लागि नेपालगन्ज जाँदा संयुक्त सुरक्षा फौजले पक्राउ गरेर करिब तीन महिना जेलमा राखेको थियो थारूलाई । भूमिगत छँदा थुप्रै चुनौती सामना गरेको उनले बताइन् । 

अब उनी सबै पक्षलाई समेटेर नगर विकासका लागि क्रियाशील हुने योजनामा छिन् । आफूजस्तै द्वन्द्वपीडितको समस्या समाधान गर्ने उनको मुख्य चाहना छ । ‘द्वन्द्वपीडितको पुनस्स्थापना र शिक्षित बेरोजगारलाई रोजगारी दिलाउने प्राथमिकता छ । द्वन्द्वमा धेरै दुस्ख भोगेकाले पीडितको मर्कालाई नजिकबाट अनुभूति गरेकी छु,’ उनले भनिन्, ‘नगरपालिकाको विकासका लागि सकेसम्म प्रयत्न गर्नेछु ।’ पर्यटकीय र धार्मिक केन्द्रका रूपमा परिचित ठाकुरबाबालाई समृद्ध नगर बनाउने योजना थारूले सुनाइन् । नगरपालिका प्रमुखमा भने एमालेका घननारायण श्रेष्ठ निर्वाचित भएका छन्।