सुत्केरी महिलालाई पोषण भत्तादेखि निःशुल्क स्वास्थ्य बीमा

नवलपरासी । सुनवल नगरपालिकाका सुत्केरी महिलालाई पोषण भत्तादेखि निःशुल्क स्वास्थ्य बीमा उपलव्ध गराइने भएको छ ।  नगरपालिकाको आइतबार सम्पन्न पहिलो जनप्रतिनिधिको बोर्ड बैठकले ‘सुत्केरी स्याहार पोषण' वापत २ हजार नगद र नि:शुल्क स्वास्थ्य बीमा गर्ने निर्णय गरेको हो ।

नगर प्रमुख भिमबहादुर थापाको अध्यक्षतामा सम्पन्न बैठकले रकम पाउन ३५ दिनभित्र अनिवार्य जन्मदर्ता गराउनुपर्ने प्रावधान राखिएको छ । बैठकबाट निर्णय भएको उक्त सुविधा नगर परिषद्ले पास गरेपछि तत्काल लागू हुने छ ।

त्यसैगरी नगर क्षेत्रमा रहेका सुत्केरी, जेष्ठ नागरिक र असहायको निःशुल्क स्वास्थ्य बीमा गर्नका लागि आवश्यक प्रकृया अघि बढाउन उपप्रमुख दधिराम अर्यालको संयोजकत्वमा पाँच सदस्यीय ‘स्वास्थ्य बीमा अध्ययन समिति' गठन गरिएको छ ।

नगर क्षेत्रमा रहेका अव्यवस्थित बसोबासलाई व्यवस्थित गर्दै वितरण हुन रोकिएका जग्गाधनीपुर्जाको अध्ययन गरी वितरणको व्यवस्था मिलाउन उपप्रमुख अर्यालको संयोजकत्वमा जग्गा व्यवस्थापन अध्ययन समिति गठन गरिएको छ । यो खबर अन्नपूर्ण पोस्टमा छापिएको छ । 
जिल्लामा गठन भएको मनसोबा सुकुम्बासी समस्या समाधान आयोगले वितरण गरेका करिब छ हजार बढी जग्गाधनी पूर्जा अख्तियारमा मुद्दा परेपछि वितरण हुन सकेको छैन। 
त्यस्तै बोर्ड बैठकले एक महिना भित्र सबै वडामा कार्यालय स्थापना गर्ने, बालमैत्री नगर क्षेत्र विस्तार गर्ने र जग्गा प्लटिङ्ग र नक्शा पास न्यूनतम मापदण्ड पूरा गरेर लागू गर्ने निर्णय गरेको छ ।