युवती घरमा यौन शोषणमा लगाउन खोजेपछि भागेर नेपाल

कार्तिक १७, काठमाडौं । कुवेत पठाएकी युवतीलाई घरमा यौन शोषणमा लगाउन खोजे पछि भागेर नेपाल फर्केकी छन् । उनीलाई कम्पनीमा क्लिनर भन्दै कुवेत पठाइएको थियो । बागलुङको काठेखोला गाउँपालिका–८ की २३ वर्षीया कौशिला विक कुवेत पुगेको २८ दिनमा नेपाल फर्केकी हुन् ।

गत असोज १० गते आफ्नै भिनाजु नाताका पुरन विकले ती युवतीलाई कुवेत पठाएका थिए ।केन्द्रको पहलमा उनी कात्तिक ७ गते नेपाल फर्किएकी हुन्  यौन शोषण गर्न खोजेपछि भागेर ज्यान बचाएकी उनले आप्रवासी स्रोत केन्द्र बागलुङको सहयोगमा घर फर्कन सकेकी हुन् । । अहिले उनी बागलुङ आइपुगेकी छिन् ।

ती युवतीलाई त्रिभुवन अन्तर्राष्ट्रिय विमानस्थल पुग्दासम्म  भिसा नदेखाइकन बुटवलका सहदेव बराईले कुवेत पठाइदिएका थिए । जहाज चढेपछि घरेलु कामदार रहेछ भन्ने थाहा पाएकी उनले कुवेतमा २६ दिन बस्दा ३ वटा घरमा फेरेर काम गर्न बाध्य भइन् । ‘पहिलो दिनमा पुगेको घरमा सरसफाइ गर्न लगाइयो,’ उनले भनिन्, ‘दस दिनमै दोस्रो घर पठाएर यौन सम्पर्क गर्न भनियो, मैले नमानेपछि भाग्नुपर्‍यो ।’ पटक–पटक पैसा दिने प्रलोभनमा उक्त घरका मालिकले यौन सम्पर्क गर्न दबाब दिएको उनले बताइन् ।

आफूलाई दबाब दिएपछि उनले तत्काल आप्रवासी स्रोत केन्द्रमा जानकारी गराइन् । घरपरिवारमा सम्पर्क गरेर कागजात पठाउने काममा गाउँकार्यपालिका सदस्य पूर्णमाया सुनार र केन्द्रकी परामर्शदाता गंगा शर्मा रिजालले साथ दिएको उनले बताइन् । ‘समयमा नेपालमा सम्पर्क गर्न पाएर उम्केर आउन सकेकी हुँ,’ उनले भनिन्, ‘मोबाइलसमेत खोसेर राखेकोले अपरिचित महिलाको सामाजिक सञ्जालबाट केन्द्रको सम्पर्कमा आउन सकेको हुँ ।’ नगर प्रमुख वसन्तकुमार श्रेष्ठले वैदेशिक रोजगार बोर्डसहितका निकायमा समन्वयमा साथ दिएपछि उनलाई तत्काल फिर्ता ल्याउन सकेको शर्माले बताइन् ।

विवाहपछि पतिले छाडे, ६ बर्षको छोरा पाल्नुपर्ने बाध्यताले उनी विदेश गएकी थिइन् । कम्पनी भनेर यौन धन्दामा पठाउने एजेन्टलाई कारवाही गर्नुपर्ने उनले माग गरिन् । ‘कुवेतमा रहेका अरु पीडितलाई पनि उद्धार गर्नुपर्छ भन्ने सन्देश पुर्‍याउन भागेर आएँ,’ उनले भनिन् ।

ऋण खोजेर २५ हजार रुपैयाँ बुझाएपछि एजेन्टले उनलाई विदेश पठाइदिएका थिए । फर्केर उक्त ऋण तिर्ने उनलाई पीर परेको छ । विकलाई विदेश पठाउनेको खोजी गरेर कारबाही प्रक्रिया अगाडि बढ्ने केन्द्रका प्रमुख मीनप्रसाद उपाध्यायले जानकारी दिए  ।