मोबाइलमा 'रिङ ब्याकटोन' बजाउँदैमा छुवाछुत अन्त्य हुँदैन : सांसद नेपाली

जेठ २४, काठमाडौं ।राष्ट्रिय प्रजातन्त्र पार्टीकी सांसद अनिशा नेपालीले जातीय भेदभाव र छुवाछुत अन्त्य गर्न अहिलेको सदनबाट ठोस निर्णय गर्न माग गरेकी छन् । प्रतिनिधिसभाको बुधबारको बैठकमा उनले दलित समुदायका हक र अधिकार संविधानको धारा र नारामै सीमित भएको भन्दै यस्तो माग गरेकी हुन् ।

शून्य समयमा बोल्दै उनले भनिन्, ‘सम्माननीय सभामुख महोदय, भर्खरै जेठ २१ गते जातीय छुवाछुत तथा उन्मुलन दिवसको अवसरमा मोबाइलमा रिङ ब्याकटोन बजाइयो । भन्दा जातीय छुवाछुत सामाजिक रुपमा निन्दनीय र कानुनी रुपमा दण्डनीय छ भनेर भनिन्छ । तर, दलित समुदायका हक र अधिकार संविधानको धारा र नारामै सीमित छन् । तर‚ पनि अहिलेसम्म समाजमा जातीय विभेदको अन्त्य भएको छैन ।'

सांसद नेपालीले संविधानको धारा २४ र ४० को कार्यान्वयनमा सरकारले चासो नदिएको समेत गुनासो गरिन् । 'संविधानको धारा २४ र धारा ४० को उपधारा १ देखि ६ तथा धारा ४२ सम्मले दलित समुदायको अधिकारबारे व्यवस्था गरेका छन् । ती विषय कागजमा छन्,' उनले भनिन्, 'अझै पनि मोबाइलमा 'रिङ ब्याकटोनु बजाएर छुवाछुत अन्त्य हुन्छ भन्ने विश्वास कायम रहेको देखिन्छ, मलाई त त्यसरी केही होला जस्तो लाग्दैन । यसबारे म गम्भीर ध्यानाकर्षण गराउन चाहन्छु ।'

उनले अहिले पनि कथित सानो जात भन्ने आरोप लगाएरै दलितहरुको ज्यान लिने काम नरोकिएको बताइन् ।

'संविधान र ऐनकानुनले व्यवस्था गरे पनि छुवाछुतविरुद्धको सरकारी पहल बलियो हुन सकेको छैन । दलित समुदायले छुवाछुतको युगीन दासत्व र अन्याय अहिले पनि खेपिरहेका छन्,' उनले भनिन्, 'त्यसैले जातीय छुवाछुत अन्त्य गर्न अहिलेकै सदनबाट ठोस निर्णय गर्नका लागि अनुरोध गर्न चाहन्छु ।’
कान्तिपुर