मेयर कार्यकक्षअघि उभिएर आन्दोलनरत ईःलाई भेटेर उपमेयर डंगोलले भनिन,' वैकल्पिक व्यवस्थासम्बन्धी नीति बनाउन आफू प्रतिबद्ध छु'

भदौ ९,काठमाडौं ।काठमाडौं महानगरपालिकाकी उपमेयर सुनिता डंगोलले प्रदर्शनीमार्गस्थित मेयर बालेन्द्र शाहको कार्यकक्ष अगाडि ८ दिनदेखि उभिएर जवाफदेहिता मागिरहेका सामाजिक अभियन्ता ईःलाई भेटेकी छन् । उपमेयर डंगोलले ईस्सहित आन्दोलनरत युवाहरूलाई भेटेर उनीहरूले उठाएका मागको विषयमा फुटपाथबाट विस्थापित भएकाहरूलाई वैकल्पिक व्यवस्थासम्बन्धी नीति बनाउन आफू प्रतिबद्ध रहेको बताएकी हुन् ।

उभिएर आन्दोलन गरिरहेका आज आठौँ दिन भयो । मेयर शाहले चुनावअघि सडकमा व्यवसाय गरेर बसेका साना व्यवसायीको उचित व्यवस्थापन गर्ने बताएकोमा अहिले त्यो प्रतिबद्धताविपरीत कार्य गरेको भन्दै सडक र फुटपाथमा व्यवसाय गरेर खानेहरूलाई विकल्प दिएर व्यवस्थापन गर्न  युवाहरूले माग गरिरहेका छन् ।त्यस क्रममा उनले १६५ घण्टादेखि निरन्तर उभिएका ईस् को स्वास्थ्यबारे जानकारी लिएकी थिइन् ।उभिएका कारण ई: का खुट्टा सुन्निएका छन् ।

मेयर शाहले भने आन्दोलनरत अभियन्ता ई:लगायत युवाहरूसँग वार्ता गर्न नचाहेको भन्दै सामाजिक सञ्जालमा आलोचना भइरहेको छ ।