महिला चालक सशक्तीकरणमा इनड्राइभको ‘ड्राइभिङ नारी नेपाल’ पहल

साउन १२ ,काठमाडौं । राइड–हेलिङ सेवा प्रदायक ष्लम्चष्खभ नेपालले महिला सशक्तीकरणलाई केन्द्रमा राख्दै ‘इनड्राइभ ड्राइभिङ नारी नेपाल’ नामक प्रमाणपत्र कार्यक्रम सञ्चालन गरेको छ।
कार्यक्रमको उद्देश्य महिला चालकहरूलाई व्यावसायिक रूपमा सक्षम बनाउनुका साथै सुरक्षित र आत्मनिर्भर बनाउने रहेको कम्पनीले जनाएको छ। यस पहलअन्तर्गत सहभागी महिलालाई ड्राइभिङ सीप, सडक सुरक्षा, ग्राहक सेवा र डिजिटल प्लेटफर्म प्रयोगसम्बन्धी तालिम प्रदान गरिएको थियो।
इनड्राइभ नेपालका प्रतिनिधिहरूका अनुसार, यातायात क्षेत्रमा महिलाको सहभागिता बढाउँदै रोजगारीका अवसर सिर्जना गर्ने लक्ष्यसहित कार्यक्रम ल्याइएको हो। कार्यक्रममा सहभागी महिलाहरूलाई तालिमपछि प्रमाणपत्र प्रदान गरिएको छ, जसले उनीहरूलाई पेशागत रूपमा थप विश्वास र अवसर दिलाउने विश्वास गरिएको छ।
कार्यक्रममा सहभागी महिलाहरूले यस्ता पहलले आत्मविश्वास बढाएको र आयआर्जनको नयाँ बाटो खुलेको प्रतिक्रिया दिएका छन्। नेपालमा परम्परागत रूपमा पुरुषप्रधान मानिने सवारी क्षेत्रमा महिलाको उपस्थिति बढ्नु सकारात्मक परिवर्तनका रूपमा हेरिएको छ।
इनड्राइभले आगामी दिनमा यस्ता कार्यक्रमलाई अझ विस्तार गर्दै देशका विभिन्न सहरमा सञ्चालन गर्ने योजना समेत सार्वजनिक गरेको छ।