मञ्जु शर्मा अन्सारीले लिइन् प्रतिनिधिसभा सदस्यको शपथ

चैत १९, काठमाडौंं ।  मञ्जु शर्मा अन्सारीले लिइन् प्रतिनिधिसभा सदस्यको शपथ । जनता समाजवादी पार्टीमा रिक्त रहेको प्रतिनिधिसभा सदस्य पदमा मञ्जु शर्मा अन्सारीले शपथ ग्रहण गरेकी छन् । सभामुख देवराज घिमिरेले सिंहदरबारमा अन्सारीलाई आइतबार पद तथा गोपनियताको शपथ ग्रहण गराएका हुन् ।

यसअघि समानुपातिक निर्वाचनबाट प्रतिनिधिसभा सदस्य बनेकी सांसद शहनाज रहमानको निधन भएपछि एक पद रिक्त भएको थियो । जसपाले गत चैत २ मा रिक्त भएको प्रतिनिधिसभा सदस्य पदमा अन्सारीको नाम सिफारिस गरेको थियो ।

अन्सारी सप्तरीकी नेता हुन् । बन्दसूचीमा उनको नाम मुस्लिम महिला क्लस्टरतर्फ दोस्रो नम्बरमा रहेको थियो ।