बजेटको सिद्धान्त र प्राथमिकता लय मिलेको निबन्ध जस्तो : दिलकुमारी थापा

बैशाख २५, काठमाडौं । राष्ट्रिय सभा सदस्य दिलकुमारी थापा रावलले विनियोजन विधेयक २०८० का सिद्धान्त र प्राथमिकता लय मिलेको निबन्ध जस्तो भएको टिप्पणी गरेकी छन् ।

राष्ट्रिय सभाको सोमबारको बैठकमा आगमी वर्षको बजेट र सिद्धान्तमाथि छलफल गर्दै उनले गठबन्धन सरकारले चालु बजेटमा ८ प्रतिशतको आर्थिक वृद्धिदरको लक्ष्य राखेको भए पनि त्यो पूरा नहुने स्थिति स्पष्ट रहेको बताइन् । उनले फराकिलो आर्थिक वृद्धिदर हासिल गर्ने लक्ष्य लिएको वर्तमान गठबन्धन सरकारले लक्ष्य पूरा किन नगरेको भन्दै प्रश्न गरिन् ।

‘माननीय अर्थमन्त्रीज्यूले संघीय संसदमा प्रस्तुत गर्नुभएको विनियोजन विधेयक २०८० का सिद्धान्त र प्राथमिकताका बारेमा हामी छलफल गरिरहेका छौ । वर्तमान गठबन्धन सरकारले चालु बजेटमा ८ प्रतिशतको आर्थिक वृद्धिदरको लक्ष्य राखेको थियो,’ उनले भनिन्, ‘आजका दिनसम्म करिब ३ प्रतिशतको आर्थिक वृद्धिदरको सीमितताभित्र अहिलेको अवस्था छ । त्यो अवस्था कसरी सिर्जना भयो ? अहिलेसम्म के के भए र आगामी दिनमा हामी फराकिलो आर्थिक वृद्धिदर हासिल हुन्छ भनेर पत्याउने र विश्वास गर्ने आधार कसरी सिर्जना गर्नसक्छौं ?’

उनले फराकिलो आर्थिक वृद्धिदर भनेको कति अंकमा हो ? त्यो अंक सरकारले स्पष्ट गर्न नसकेको उनले बताइन् । उनले गत वर्ष बजेट निर्माणको क्रममा करको दर हेरफेर भएको र जसका कारण उद्योगी व्यवसायीमा नकारात्मक प्रभाव परेको बताइन् ।

‘फराकिलो भनेर भाषा मात्रै छ । सिद्धान्त र प्राथमिकता लय मिलेको निबन्ध जस्तोको रुपमा प्रस्तुत भएको छ,’ उनले भनिन्, ‘गत वर्ष बजेट निर्माणको क्रममा करको दर हेरफेर गर्दा बिचौलियाको प्रयोग भयो, जसका कारण आज नेपाली उद्योग धन्दाहरु धराशायी हुन पुगे, उद्योगी व्यवसायीमा नकारात्मक प्रभाव परेको छ, वर्तमान अर्थमन्त्रीज्यु यो बारेमा कति सचेत हुनुहुन्छ ?विगतमा भएको बिचौलियाको प्रयोग हुँदैन भन्ने प्रत्याभूति यो सरकारले संसद र जनतालाई दिनुपर्छ ।’

उनले स्रोतको जोहो गर्न वर्तमान सरकार दबाबमा रहेको उल्लेख गरिन् ।