बैशाख २०, काठमाडौं । सञ्चार तथा सूचना प्रविधिमन्त्री रेखा शर्माले अहिले समाज नकारात्मकतातिर गइरहेकाले प्रेसले समाजलाई सकारात्मकतातर्फ डोर्याउनुपर्ने बताएकी छन् ।
विश्व प्रेस स्वतन्त्रता दिवसको अवसरमा पत्रकार महासंघले गरेको कार्यक्रममा बोल्दै मन्त्री शर्माले समाजमा नकारात्मकता बढ्दा खराब मनसाय बोकेका पात्रहरू स्थापित भइरहेकाले प्रेसले समाजलाई सकारात्मकतातर्फ डोर्याउनुपर्ने बताएकी हुन् ।
‘समाज नकारात्मकतातिर गइरहेको छ, जसले गर्दा नकारात्मक पात्रहरू स्थापित भइरहेका छन् । प्रेसले समाजलाई सकारात्मकतातर्फ डोर्याउनुपर्छ‚’ उनले भनिन् । प्रेस स्वतन्त्रताको विषयमा सरकार प्रतिबद्ध रहेको भन्दै मन्त्री शर्माले आगामी दिनमा प्रेस थप जिम्मेवारी बोध गर्दै अगाडि बढ्नुपर्ने बताइन् ।
महासंघले बुधबार सिनामंगलदेखि सञ्चारग्रामसम्म र्यालीको आयोजना गरेको थियो ।
त्यस्तै मन्त्री शर्माले प्रेस स्वतन्त्रताको प्रत्याभूतिमा देखिएका डिजिटललगायतका चुनौती कम गर्न साइबर सुरक्षा नीति, साइबर सचेतनाका कार्यक्रममा पनि सरकार गम्भीर रहेको समेत प्रस्ट पारेकी छन् ।
सन् १९९३ मा भएको संयुक्त राष्ट्रसङ्घीय साधारणसभाको घोषणापछि युनेस्कोको आह्वानमा हरेक वर्ष ३ मे का दिन नेपालसहित विश्वभर प्रेस स्वतन्त्रता दिवस मनाउने गरिएको छ ।